بيشتغل إيه ؟ معرفش يمكن ميكانيكي أو ترزي أو مهندس أو قهوجي ...بس هوا شاب من اللي ابتسامتهم حلوه وأكيد مش منافق وبيحب البلد دي زيي زيك أو إحناللي بنحبها زيه ...اللي متأكد منه إنه عنده أب وأم واخوات بنات بيستنوه كل ليله يدخل عليهم بحاجه حلوة ...أكيد عنده موبايل صيني من اللي صوته عالي وبيضايق حضرتك ...أكيد عنده بنت بيحبها يمكن تكون بنت عمه أو بنت الجيران أو بنت صاحب الشغل ...أكيد عامل جمعية علشان يقبضها بدري علشان يعرف يجيب شقة إيجار جديد ويفرشها فرش بسيط ويجيب لأمه واخواته عبايات حلوة يحضروا بيها فرحه ... ولما سمع ان فيه ناس بتموت ساب اللي وراه واللي قدامه ونزل عالميدان ... بس مكانه مش وسط المتفرجين ... مكانه وسط المقاتلين ف الصفوف الاولي ...وجايزته طلقة ف القلب أو طلقتين أو تلاته بنعرفهم لما نحط صباعنا مكان الطلقة علشان نثبت لوكيل النيابة إنها طلقة نارية مش جرح غائر أو سطحي.... أبوه راجل طيب بيحتسبه عند ربنا ...أمه ست طيبه لابسه إسود حاضنة هدومه أو ما تبقي منها ونفسها تشوفه مرة أخيره وبنحاول نمنعها علشان المنظر وحش ... تصريح الدفن بيطلع...جنازة ...صراخ اخواته البنات ودموعهم اللي بتلسعك انت شخصيا ...أمه طبعا دموعها جفت من كتر العياط وأبوه تايه وبيسأل ليه ؟ بقي كده يا محمد "أيا كان إسم الشهيد" ............ نرجع عالميدان شايلين حزننا عالشهيد وحزن أهله علي اكتافنا وندور علي حد ياخد الحمل داه ويحوله لنور وأمل ومستقبل مشرق منلاقيش ...نرجع بيه بيوتنا وننام وهوا علي صدورنا ...ويوم بعد يوم يتحول الشهيد لرقم ...لورق ...لمبلغ مالي ...لصورة ...لحفلة تكريم ...وعمره مبيتحول لشئ من اللي مات علشانه ..
شكرا
يارب ارحم شهدائنا وقدرنا نجيب حقهم
ReplyDeleteالاموات لا يموتون حين نواريهم الثرى ....ولكنهم يموتون حين ننساهم ....
ReplyDeleteبص للميدان ...لكل ميادين مصر وانت تعرف ...اننا مش ناسيين و الدم ماهانش كل المصابي و الشهداء الجداد دول لاننا مش ناسيين ولا حننسى ...بالعكس الناس فاكرة قوى ان الشهداء ماتوا علشان حاجات مهمة ..ونازلين يجيبوها بدمهم تانى ...و حننزل تالت و رابع وعاشر ...
اموت اموت وبلادى تعيش ...