دليل الناخب

المقدمة دي كتبتها وأنا متفائل ومكانش لسه قبح المجلس ونواياه الخبيثة طلعت عالسطح وكنا متخيلين اننا نقدر نفرض إرادتنا عليهم بطريقة غير صدامية باعتبار انهم عالأقل هيحترموا نتيجة الاستفتاء اللي خرموا دماغنا بيه فماتآخذونيش :)

لأن البرلمان الجاي هيبقي عنده مهمه هتأثر علي مستقبلنا كلنا لسنين طويله جايه وهيا مهمة وضع الدستور الجديد ، ولأننا عندنا أمل انه يبقي برلمان حقيقي بيعبر عننا بجد بدل برلمانات التزوير والبلطجه ولحس الجزم اللي فاتت يبقي لازم نخلي بالنا من الانتخابات اللي هتجيب البرلمان داه ونعرف كل تفاصيلها ونبقي حريصين علي ان صوتنا يروح للي يستاهله ونعرف الحكاية ماشية ازاي بعد التعديلات الكتير اللي عملوها علي قوانين مباشرة الحقوق السياسيه ومجلس الشعب والشوري :

-    طيب علشان يبقي من حقك انك تدلي بصوتك ف الانتخابات الجايه إيه الشروط ؟ المفروض تكون متوافره فيك الشروط اللي بتقول عليها الماده 1 من قانون مباشرة الحقوق السياسيه : انك يكوون عندك 18 سنه وطبعا تكون مصري ومتكونش بتشتغل لا في الجيش ولا في الشرطه ولا مجند طبعا

-         طيب ممكن يبقي في حد متوافر فيه الشروط دي بس ميبقاش من حقه برضه يدلي بصوته ؟

طبعا ممكن في الحالات دي :

لو كان محكوم عليه في جناية أو محكوم عليه بالحبس في سرقة سرقة أو إخفاء أشياء مسروقة أو نصب أو إعطاء شيك لا يقابله رصيد أو خيانة أمانة أو غدر أو رشوة أو تفالس بالتدليس أو تزوير أو استعمال أوراق مزورة أو شهادة زور أو إغراء شهود أو هتك عرض أو إفساد أخلاق الشباب أو انتهاك حرمة الآداب أو تشرد أو في جريمة ارتكبت للتخلص من الخدمة العسكرية والوطنية، وكمان المحكوم عليه لشروعه ف ارتكاب واحده من الجرائم دي بشرط ميكونش الحكم مع إيقاف التنفيذ أو يكون المحكوم عليه إترد إليه اعتباره ، وكمان المحكوم عليه في جريمة من الجرائم الانتخابيه وكمان من سبق فصله من العاملين في الدولة أو القطاع العام لأسباب مخلة بالشرف ما لم تمر خمس سنوات من تاريخ الفصل إلا إذا كان صدر لصالحه حكم نهائي بإلغاء قرار الفصل أو التعويض عنه وكمان المحجور عليهم طول مدة الحجر والمصابين بأمراض عقليه طول مدة حجزهم في المصحه واللي تم إشهار إفلاسهم لمدة خمس سنين من شهر افلاسهم طالما ما اتردش اعتبارهم.

- طيب مطلوب من حضرتك أي إجراء معين علشان إسمك يبقي مقيد في الجداول الانتخابيه؟

الكلام دا كان زمان ودلوقت اسمك بيتقيد تلقائيا في الجداول الانتخابية بناء علي بيانات بطاقة الرقم القومي بتاعتك

- طيب مين اللي المفروض يحدد ميعاد الانتخابات ؟

المفروض يبقي ؤرئيس الجمهوريه بس المره دي هيبقي المجلس العسكري علشان لسه معندناش رئيس

-طب ومين بقي اللي بيشرف علي الانتخابات وينظمها ؟

المفروض يعمل كده هو اللجنة العليا للإنتخابات ودي لجنة برئاسة رئيس محكمة استئناف القاهرة وعضوية أقدم نائبين من نواب رئيس محكمة النقض ،وأقدم نائبين لرئيس مجلس الدولة ،وأقدم رئيسين بمحاكم الاستئناف تاليين لرئيس محكمة استئناف القاهرة

-         طب وإيه مهمة اللجنه دي؟

خد عندك يا سيدي :

1-    تشكيل اللجان العامة للانتخابات ولجان الاقتراع والفرز وتعيين أمين لكل لجنة.

2-  الإشراف على إعداد قاعدة بيانات الناخبين من واقع بيانات الرقم القومي ومحتوياتها وطريقة مراجعتها وتنقيتها وتحديثها، والإشراف على القيد بها وتصحيحها

3-    وضع وتطبيق نظام للرموز الانتخابية بالنسبة لمرشحي الأحزاب السياسية والمستقلين.

4-    تلقي البلاغات والشكاوى المتعلقة بالعملية الانتخابية والتحقق من صحتها وإزالة أسبابها

5-    وضع القواعد المنظمة لمشاركة منظمات المجتمع المدني المصرية والدولية في متابعة كافة العمليات الانتخابية.

6-  وضع القواعد المنظمة للدعاية الانتخابية (على أن تتضمن هذه القواعد حظر استخدام شعارات أو رموز أو القيام بأنشطة للدعاية الانتخابية ذات الطابع الديني أو على أساس التفرقة بسبب الجنس أو الأصل.)

7-  وضع قواعد توزيع الوقت المتاح خاصة في أوقات الذروة للبث التليفزيوني والإذاعي بغرض الدعاية الانتخابية في أجهزة الإعلام الرسمية والخاصة على أساس المساواة التامة

8-    إعلان النتيجة العامة للانتخاب

9-    تحديد مواعيد الانتخابات التكميلية.

10- إبداء الرأي في مشروعات القوانين المتعلقة بالانتخابات

-         طيب واللجان الانتخابيه هتبقي عامله ازاي ؟

 كل لجنة من اللجان دي هتبقي برئاسة قاضي ( عضو في أحد الهيئات القضائيه : القضاء العادي-مجلس الدولة-النيابة الإداريه-هيئة قضايا الدوله) وأمين للجنه يختص بمسألة الانتخاب بالنظام الفردي وأمين آخر يختص بمسألة النتخاب بالقائمه وعضوين ودول بيكونو من العاملين المدنيين بالدوله ( موظفين حكومه يعني)

- طيب كل قاضي هيبقي رئيس علي لجنة فرعية واحده ؟

من حقه إنه يرأس أكتر من لجنه فرعيه بشرط ميزيدش عدد اللجان دي عن تلاته وبشرط يضمها كلها في مكان واحد من غير فواصل 

-         طيب جوا اللجنه الفرعية دي ينفع يبقي فيه حد تاني ؟

طبعا لأن كل مرشح فردي من حقه يبقي ليه مندوب جوا اللجنه وكل ممثل قائمه مغلقه من حقه يبقي ليه مندوب جوا اللجنه وطبعا المرشح أو ممثل القائمه لازم يبلغ رئيس اللجنه كتابة باسم المندوب ولو عدد المندوبين كان أقل من اتنين بعد مرور نصف ساعه علي ميعاد بدء الانتخاب يبقي من حق رئيس اللجنه انه يختار من بين الناخبين الحاضرين اللي بيعرفو القراءة والكتابة ومقيدين في نطاق اللجنة  ، ولو زاد عدد المندوبين على ثمانية والمرشحين ما اتفقوش عليهم يبقي رئيس اللجنة يختار تمانيه منهم بطريق القرعه وطبعا لو فاتت ساعة علي ميعاد بدء الانتخاب وعدد المناديب مش كامل أو رئيس اللجنه معرفش يعين مناديب يبقي تبدأ عملية الانتخاب

-         طب فيه مناديب تانيين وللا وكلاء للمرشحين ؟

طبعا فيه حق لكل مرشح أنه يوكل عنه واحد من الناخبين من المقيدين في ذات الدائرة الانتخابية علشان يمثله أمام كل لجنة انتخابية عامة أو فرعية ويكون للوكيل داه حق الدخول في لجنة الانتخابات أثناء مباشرة عملية الانتخابات وأنه يطلب من رئيس اللجنة إثبات الملاحظات اللي يشوفها في محضر الجلسه ، ومالوش حق دخول قاعة الانتخاب في غير الحاله دي، والوكيل دا لازم يكون بموجب توكيل مصدق عليه من إحدى جهات الإدارة أو اللجنة الانتخابية بالمحافظة، ويكون التصديق بغير رسم ولو كان أمام إحدى الجهات المختصة بالتصديق على التوقيعات ولا يجوز أن يكون المندوب أو الوكيل عمدة أو شيخا ولو كان موقوفا.

-         طب ولو عضو من أعضاء اللجنة أو واحد من أمنائها تغيب مؤقتا ؟

يبقي رئيس اللجنه يعين واحد يحل محله من بين الناخبين الحاضرين اللي بيعرفو القراءة والكتابة.

-    طيب ومين المسئول عن حفظ النظام في اللجان الانتخابيه ؟ وهوا اللجان الانتخابيه دي هيا بس المكان اللي بيحصل فيه الانتخاب ( الأوده أو المكتب)؟

بص يا سيدي الوحيد المسئول عن حفظ النظام في اللجان الانتخابيه هوا رئيس اللجنه ومن حقه يستعين بالشرطه عند الضروره مع ملاحظة إن مش من حق أي حد من رجال الشرطه انه يخش القاعه اللي بيحصل فيها الانتخاب ولو حصل يبقي رئيس اللجنه لازم يثبت داه في محضر الإجراءات ، وبالنسبه لحدود اللجنه الانتخابيه فهيا عباره عن القاعه اللي بيحصل فيها الانتخاب والفضاء الللي حواليها ودا بيحدده رئيس اللجنه قبل بدء الانتخابات

-         طيب ميعاد الانتخابات بقي من الساعه كام للساعه كام ؟

القانون بيقول انه من الثامنه صباحا إلي السابعه مساء ، يعني لو حضرتك رحت بعد الساعه السابعه مساء يبقي مش من حقك تدلي بصوتك ، لكن لو رحت قبل الساعه السابعه مساء ولسه ما أدليتش بصوتك والساعه بقت سبعه إوعي تروح لأن أي حد موجود داخل مقر اللجنه قبل الساعه سبعه مساء من حقه يدلي بصوته أيا كان الوقت اللي هتقفل فيه اللجنه الانتخابيه كل ما في الحكايه ان رئيس اللجنه المفروض يعمل كشف بأسماء الناس الموجودين ف اللجنه ولسه ما أدلوش بصوتهم ويتمكنو من انهم يدلو بصوتهم أيا كان الوقت

-         طيب لما تدخل بقي علشان تدلي بصوتك إيه النظام جوا اللجنه ؟

المفروض ان رئيس اللجنه يديك بطاقة الانتخاب وتتأكد وانت بتاخدها انها مختومه من ضهرها بختم اللجنه وعليه تاريخ الانتخاب وطبعا من حقك تدلي بصوتك بسريه يعني محدش يشوف انت بتعمل ايه وبعد ما تخلص تطبق البطاقه وتسلمها لرئيس اللجنه يحطها ف الصندوق قدام عينيك وبعدين تحط صباعك ف الحبر الفسفوري وتمضي قدام اسمك ف الكشف .

عزيزي الناخب : عايز انتخابات ؟؟ خووووووووووووود انتخابات :)