Monday 29 April 2013

عن التضامن والمتضامنين


بتزعل لما واحد صاحبك يتقبض عليه أو يتحبس أو يحصلله مكروه ؟؟ أكيد طبعا لأن دا شئ بشري ولو معملتش كده تبقي قليل الأصل
زمان يوم 30 يناير 2011 كنت مقبوض عليا بواسطة الشرطة العسكرية   http://malekadly.blogspot.com/2012/01/blog-post_30.html، خطيبتي وقتها اللي هيا مراتي دلوقت راحت لزميل بعزه وبحترمه وبيننا وبين بعض ذكريات نضال كتير وقالتله مالك اتقبض عليه ، قاللها بقمة الحكمة اهدي بس إحنا ف ثورة وأكيد فيه ناس هيتقبض عليها وناس هتموت ، مراتي شتمته وسابته وراحت كتبت علي يافطة : الحرية لمالك عدلي وبقت قاعدة بيها ، واللي يشوفها يسألها ويحاول يطمنها بس بجد مكانش فيه حاجة تتعمل .
من جوه المكان اللي كنت محبوس فيه قدرت أكلم زميل عزيز لينا ف التليفون لأن الرسائل كانت مش شغالة وقلتله أنا فين تحديدا وأكدت عليه يطمن الناس ... بس يظهر ف الزحمة نسي وكانت النتيجة ان محدش كان عارف أنا فين ، وبعديها وبسبب إن سالي سامي واسماء صمموا إنهم يعرفوا أنا فين بغض النظر عن اي ظروف ، راح أساتذتي وزملائي خالد علي وأحمد فوزي وأحمد سيف الإسلام ومعاهم زكريا عبدالعزيز لقائد قوة الجيش اللي كانت قدام المتحف والراجل وعدهم بس يعرف مكاني وهيطمنهم ويحل المشكلة ، وطبعا كان مجرد كلام
بعديها راح الزملاء رضا مرعي وطاهر أبو النصر ومحسن بشير وعدد من الزملاء للمنطقة المركزية العسكرية يسألوا عني وقالولهم إني مش موجود علي غير الحقيقة وهكذا
طبعا أنا كنت جوه قلقان بشكل بشع علي خطيبتي وأخويا الصغير اللي ف الميدان وأصحابي وخايف من قلق أهلي من اختفائي وخاصة إن الحركة جوه المنطقة المركزية مكانتش طبيعية ولا تبشر بخير ، المهم يعني لما زهقت والقلق كان بياكلني كلمت والدي واتصرف وبعديها بساعة كنت بره
عمري ما هنسي الكلمة اللي قالها الزميل لمراتي بتاعة إحنا ف ثورة وأكيد فيه ناس هتروح ، ولا الزميل اللي كلمته ف التليفون أقوله أنا فين ومبلغش حد ربما بسبب الزحمة أو إنه نسي ، الله أعلم .... بس ف نفس الوقت قادر ألتمس للناس عذر ومعنديش أي مشاعر سلبية تجاههم بسبب الموضوع داه بس كل أما افتكره بيولد جوايا شعور مرير
طبعا فيه ناس اهتمت ودورت وقلبت الدنيا عليا زي ما واضح وفيه ناس أصلا كانت تعرف أنا محتجز فين ومقالتش وناس حتي ربنا موفقهمش يطمنوا خطيبتي أو يكلموها بشكل مطمئن ولو مش هيعملوا حاجة
وهيا دي حكاية التضامن ... لما الدنيا بتتزحم مبيدورش عليك غير اللي منك ، ولو الدنيا فاضية هتلاقي الناس مبتتأخرش عن تقديم المساعدة لأي مظلوم بغض النظر عن إن هوا معروف من عدمه ، وكمان فيه قضايا التضامن فيها ومتابعتها والتصميم علي إنها تخلص لصالحنا جزء من معركتنا مع النظام ولذلك لما جرعة التضامن فيها تزيد يا ريت منأفورش ونقول معروفين ومش معروفين والكلام الفارغ داه
تخيل طاقة الناس بعد تلت أشهر اتقبض فيهم علي أكتر من 3500 شاب وشابة واشتباكات وشهداء ودم وتشهير وتحقيقات وكفالات ودوخة ، أكيد محتاجين يشحنوا ويرتاحوا ويفصلوا ، مش هنكسب حاجة والناس فاضية من جوه أو وهما متدمرين نفسيا بسبب عدم وجود فرصة لالتقاط الأنفاس ، ودا مبينفيش إننا بيننا شوية نفايات بشرية لا بتتضامن ولا بتبذل مجهود مع حد غير لو كان هيعود عليها بالنفع أو لو كانوا من المشاهير مثلا بس دي مش القاعدة العامة ، ودي ناس متتعاتبش ، بس كمان يا ريت نخفف من حالة الإبتزاز اللي شغالة عمال علي بطال بتاعة : لو كان مشهور كنتو وقفتو معاه ، ولو كان صاحبكم كنتو وقفتو معاه ، ولو كان مش عارف إيه مكنتوش سيبتوه ... علشان دا أسلوب رخيص ، قادر أعذر صاحبه بسبب التياعه مثلا علي صديق أو علي مظلوم بس بجد مش شايف إن دي الطريقة ، الحصان لما يتعب مينفعش تضربه ، ريحه واديله فرصة يلتقط أنفاسه علشان يكمل معاك الطريق ، وكمان يا ريت تاخد بالك إن درجة اهتمام الناس بالقضايا مختلفة ومش لازم كل حاجة انت شايفها مهمة (بغض النظر عن كونها مهمة فعلا من عدمه) يبقي لازم الناس تهتم بيها .

2 comments:

  1. This comment has been removed by the author.

    ReplyDelete
  2. ____________06 44 250 437

    _____MIXED merken poppers 10 Flesje 50 EURO

    _____MIXPAKKET SEXPIL 10 STRIP 75 EURO

    _____VIAGRA/virecta/FOSTER/SILDENAFIL 5 STRIP 75 EURO

    _____VIAGRA/virecta/FOSTER 7 STRIP 100 EURO

    _____kamagra 10 / STRIP 50 EURO

    _____COBRA 10 /STRIP 70 EURO

    _____CIALIS/VIKALIS 6 STRIP 75 EURO

    _____KAMAGRA JELY 5 DOOS 75 EURO

    _____P-FORCE 10 STRIP 100 EURO

    _____________VOOR HET BETER RESULTAAT NEEM SEXPILLEN MET MEEER WATER IN OP EEN LEGE MAAG ??? EINDHOVEN

    ReplyDelete