ميت يومك إنت ومرسي

طالعنا السيد العضو البلتاجي بسحنته المبتسمة دائما وهو يقول لوسائل الإعلام ونحن علي أعتاب نهاية ميت يومه هوا والرئيس مرسي قائلا : قبل أن تسأل الرئيس إسأل نفسك ماذا قدمت أنت .

طبعا أنا عندي إجابة جاهزة للسيد العضو ولكن لأن أمي قالتلي الشتيمة حرام وأنا بحاول أسمع كلام أمي ،حيث أنه اتضح وبفضل الله أن الجنة تحت أقدام الأمهات ومهياش ف الفيرمونت ولا ف صندوق الإنتخابات فأنا هحاول أرد علي السيد العضو رد موضوعي بس حابب أقولله : هما لما الإخوان بيبعتوك تجرجر رجل شوية السياسيين اللي بيموتو ف ضحكتك ورا مصنع الكراسي بتبقي عارف إنهم بيضحكو عليهم بابتسامتك اللي تجنن وللا مش عارف ؟؟ أنا قلت أقول لحضرتك يعني لو مش واخد بالك إنك يا بيه وبفضل الله جرجرت نص ساسة مصر ورا مصنع الكراسي والشهادة لله دي حاجة تتحسب ليك مش عليك

المهم خلينا ف ميت يومك إنت ومرسي :

تبدأ هذه الميت يوم يا سيادة العضو من اليوم التالي لحلف رئيس الجمهورية لليمين قدام المحكمة الدستورية طبقا للإعلان الدستوري اللي كنتم معترضين عليه ومعتصمين علشان إلغاؤه ، أنا مش بلقح وبقول إنكم عالم معندهاش مبدأ ولا حاجة أنا بفكرك بس والله ، ما علينا إذا ميت يومك انت ومرسي تبدأ في 1 يوليو 2012 وبص يا عم بقي وركز معايا من 1 يوليو 2012 ل 1 أغسطس 2012 = 31 يوم + من 1 أغسطس ل 1 سبتمبر = 31 يوم +من ا سبتمبر ل 1 أكتوبر = 30 يوم يبقي كدا كام يا بوللا ؟؟ 91 يوم يبقي فاضللكم تسع ايام ،

طيب برنامج الميت يوم دا كان الكلام علي إيه ؟؟ مش كان علي النظافة، والمرور، والوقود، والخبز، والأمن ... طب خد عندك بقي يا بوللا : البلد منضفتش لسه لا من الزبالة ولا من البشر الزبالة ، والمرور حاله متصلحش واسأل أي سواق تاكسي يا بوللا لو مش مصدقني بس ميكونش إخوان ، أما بالنسبة للوقود فأحب أقوللك إن فيه أزمة عظيمه ف عموم مصر وخاصة ف الصعيد وأنا عارف إنك مش حاسس بالأزمة مانت بتمون بالكارنيه يا بوللا ، أما عن الخبز فإنشالله تعدم عينيك لا اتحسن ولا اتوفر ، أما بالنسبة للأمن فأنا عايزك يا بوللا تيجي تريح راسك علي رجلي وألعبلك ف شعرك وأحكيلك قصة الأمن اللي متوفرش وأفاجئك بقي بالناس اللي الداخلية قتلتهم ف ميت غمر ، والشاب اللي اتقتل ف قسم شرطة طهطا ف سوهاج ، وعلي حادثة تعذيب ألبير جوه قسم شرطة المرج ، وسكان رملة بولاق اللي قلعولهم ف الشارع ، وعلي حوادث تهجير عشرات المسيحيين من بيوتهم علشان خاطر عيون حبايبكم مبيحبوهمش والأمن طلع مبيعرفش ..متفهمنيش غلط طلع مبيعرفش يحميهم يعني ... إنت نمت يا بوللا وللا إيه ؟؟ المهم يعني ابقي تعالي بالليل وأنا أوريك الويل واوعي تفهمني غلط ممكن اقابلك ورا مصنع الكراسي وأسلمك ملف كامل عن انتهاكات الداخلية وعن ملف الأمن يوريك إن وعد الأمن هوا كمان طلع فشنك

طيب وحيث إن مفيش حاجة من وعود ميت يومك إنت ومرسي اتحققت يا بوللا فإنت طليت علينا بضحكتك الجامدة اللي بتدوب قلوب العذاري وبتخليهم يمشوا وراك وهما مغمضين لمصنع الكراسي يوه أقصد للفيرمونت (مصنع الكراسي سابقا) تقوللنا قبل أن تسأل ماذا قدم الرئيس إسأل نفسك ماذا قدمت أنت ....

بص يا بوللا سواق تاكسي مبيطيقش سيرتكم أصلا قاللي إن انتم بعتولنا الهوا واحنا اشترينا وانتخبناكم إدفع بقي يا حلو ... شفت سهلة ازاي ؟؟ لا إحنا الوزارة ولا إحنا الحكومة ولا إحنا الرئيس ولا إحنا اللي بنصرف ولا بنؤمر وننهي ونطلع قرارات وقوانين فاهمني انت ؟هاه؟؟

طب انت عايزني أقدملك إيه يا بوللا ؟؟ أنزل أكنس ؟؟ طب أنزل أنا أنظم المرور ؟؟ طب أستورد باللي حيلتي جاز وأبيعه بسعر مدعم ؟؟طب أبيع عيش؟؟طب اتنكر وألبس ظابط وأحقق الأمن ؟؟

بس الشهادة لله برضه يا بوللا إحنا قدمنا كتير : عارف الشباب اللي ماتوا ف الثورة واللي اتصابوا وانتو تاجرتو بدمهم وطلعتو عالكرسي بسببهم وانتو ممرمطين أهاليهم ؟؟ مننا والله العظيم

طب عارف اللي جاع واللي اتعري وصبر علشان بكره أحسن وانتخبكم ؟؟ مننا والله العظيم

طب عارف المسيحيين اللي بيتهجروا ؟؟برضه مننا والنيعمه الشريفة

طب عارف أهالي رملة بولاق اللي داخليتكم العظيمة قلعتلهم ف الشارع وأسقطوهم ما بين قتيل وجريح ومقبوض عليه علشان خاطر عيون ساويرس ؟؟مننا برضه

وطبعا مش هكمل أقوللك إحنا قدمنا إيه يا بوللا أحسن تكون فاكر إنكو شلتو العسكر بجرة قلم وإنكم شجيعة السيما وخلصتونا من الاستبداد العسكري زي مبتقول واوعي تقول انكم طهرتو البلد من القيادات الفاسدة ، وحياة أبوك يا شيخ تديني أسماء متتكلمش ف الفاضي وأنا أطلعلك قدهم عشر مرات وأخطر منهم وانتو سايبينهم... برهامي جرصكم يا حبي وقال إنكم كنتو مخلصين مع العسكري قبل النتيجة متطلع

بص يا بوللا أنا مش هرد عليك ماتجيب بوسة حنك ؟؟؟ طب بقوللك إيه : هوا طائر النهضة بيلد وللا بيبيض ؟؟