Sunday, 29 May 2011

الداخلية وسنينها



حسن صبحي حسين 28 سنة سائق توكتوك بالعمرانيه وأثناء سيره في اتجاه مخالف استوقفه ضابط مرور يدعي عيسي السيد راشد وقام برفع التوكتوك علي ونش المرور وبعد رجاء السائق للضابط أن يتركه :
دي رواية الداخليه :
وبالنسبة لرواية أهل المجني عليه :
سواق التوكتوك انطلب منه 200 جنيه علشان يخلوه ياخد التوكتوك ويمشي فاتصل بأخوه محمود صبحي حسين وقالله هات معاك 200 جنيه وأوراق التوكتوك وتعالي فالراجل جه وقعد يتحايل عالظابط علشان المبلغ دا كبير (إضافه:الشهود أكدولي انه دفع المبلغ بس أصر انه ياخد إيصال باللي دفعه فيما بعد الكلام دا عرفته بعد ما كتبت التدوينه دي لذا لزم التنويه ) فالظابط قالله : هوا انت المحامي بتاعه يابن ال......اكه ... محمود قال للظابط امك مش أحسن من أمي ورد عليه الشتيمه فالظابط أمطره بسيل من الشتايم وقالله لو ممشيتش من هنا هضربك بالنار محمود قالله انت كداب ومش من حقك تعمل كده ... فالظابط طلع سلاحه الميري وهدد محمود اللي رفض يمشي من غير التوكتوك اللي بياكله منه عيش وصمم علي طلبه وحصلت مشاده كلاميه بينه وبين الظابط اللي أطلق عليه عيارين ناريين واحد في بطنه وواحد في أعلي فخذه الأيمن والناس شالوه وطلعوا ع مستشفي أم المصريين .. وجه ظابط مباحث من قسم العمرانيه قال انه عايز شهود الواقعه علشان يعملو محضر بيها وفعلا راح معاه اتنين شهود وأخو المجني عليه وقاله ان الظابط هواللي غلطان فاعتدو عليهم بالضرب في القسم ورموهم ف الحجز وعملولهم قضية تعدي عالسلطات وجابو شهود تانيين يشهدو برواية المباحث والنيابه قررت حبسهم 4 أيام علي ذمة التحقيق وبعدها جددتلهم 15 يوم تانيين وامباحث كانو مصممين ينقلو محمود م المستشفي لمستشفي السجن ولكن حالته ما سمحتش وكلبشوه ف السرير
أهل محمود نزلو التحرير يوم الجمعه 27 مايو يطالبو بحق ابنهم من الداخليه ومن ساعتها كل شويه رتبه تروح أوضة محمود في المستشفي يهروه شتيمه وتهديد ويمشوا ودلوقت محمود وأخوه مهددين بإنهم يتحبسوا ظلم بالرغم من إن الظابط هواللي أخطأ وخالف قواعد استعمال السلاح الناري المنصوص عليها في قانون هيئة الشرطه إضافة لإنه محدش عارف الإصابات اللي في المجني عليه اللي كانت ممكن تقتله بسهوله محدش عارف هتسيب فيه عاهه مستديمه وللا لاء ؟
وطبعا أنا مش مصدق رواية الداخليه إطلاقا لسبب بسيط هوا انهم قالو في بيانهم ان الظابط أطلق عيارين نار في الهوا وواحد علي قدم المجني عليه بس واضح انهم عندهم مشكله في العد ومشكله في معرفة القدم من البطن
 وادي صورة محمود

وادي فيديو لمحمود متكلبش وهوا في حالته الصحيه الزفت
video

والحدق يفهم بقي مين اللي بيداري ع مصيبته

8 comments:

  1. الشرطه امزالت تتعهامل كماكانت تتعامل من قبل بنفس عنصريه الماضى والامر يحتاج الى وقفهكبيرة من الشعب امام الشرطه كى تعلم ان هذا شعب له كرامه من يطائها قليواجه شعب باكمله

    ReplyDelete
  2. طب هو احنا عملنا ثوره ليه و لسه فى تعذيب فى مراكز الشرطه حد يفهمنى عشان حاسس انى هتجنن ... محتاجين ثوره فكريه ضد مفاهيم ومعتقدات غلط كتير لسه موجوده عندنا بس يعنى مثلا ظابط الشرطه مش باشا دا مجرد موظف حكومه مهمته امن البلد لازم نفهم كده والا هنبقى احنا كمان محتاجين ثوره على نفسنا

    ReplyDelete
  3. عايزين نبقي واقعيين شوية
    بس ياريت منصدقش كل حاجة بتتقال
    لان سلوك سائقي التوكتوك يتسم بالبلطجة
    وقد يكون الضابط تعرض لتهديد
    مفيش حاجة اسمها ضابط شرطة يطلع سلاحة كدة من باب حتي التهديد ب

    ReplyDelete
  4. أستاذ مالك
    لك كل التحية. ماذا عن البلاغات للنائب العام. أنتم وثقتم الحدث وياتري تم توثيق شهادات الشهود وياتري تم تقديم بلاغ للنائب العام وللمجلس العسكري. أنا والله في حيرة وخايف جداً علي البلد. أنا مش مقيم في مصر ياريت إذا كان في أي مجهود ولو بسيط أقدر اقدمه تقول لي عليه. مع التحية والتقدير

    ReplyDelete
  5. طيب عشان الضابط يطلع السلاح لازم يكون اللي قدامه ع الاقل مسلح طيب بس هو ماسبتش انه كان معاه سلاح طب ايه التهديد بقي اللي هيقع ع الظابط وبعدين هيضربو يقوم يضربو ضرب موت والا يعجزه وبس

    ReplyDelete
  6. معلهش ياجماعة ؛إحنا نعمل نداء للكثيرين اللي كانوا موجودين أثناء الواقعة وشافوها علشان يرووا الحقيقة وياريت يتصلوا أولاًبحد يكون موثوق فيه ومش عايز يمشي على محاور تخريبية لاستعادة مكانته وتسيده سواء كان بتهريب المساجين من الأقسام أو بإهمال مقتضيات مهام وظائفهم وتحقيق الانفلات الأمني؛أو بإرهاب الناس وضربهم والتعامل مع الجميع وعلى حد سواء على أنهم خارجين عن القانون ؛ولسةبكرة يبتكروا لنا شيئاًجديداًمثل أن من يذهب لهم ببلاغ مش بعيد يقبضو عليه وعلى المشكو في حقه ويلفقوا لهعدة قضايا من بينها أنهما قاما بإزعاج السلطات.

    ReplyDelete
  7. البلطجه أنواع يعني مثلآ سواق الميكروباص لما يبلطج يقف على راس النفق او الكوبري عشان يحمل أو بالكتير يزنق عليك في الطريق عشان يمر الاول وفي النهاية بيحاول يزود دخله بطريقة مزعجة
    لكن تخيل لما واحد من الداخلية يبلطج ممكن يعمل إيه ؟ ممكن يلبس إنسان برئ قضية تنهي مستقبله أو حياته وفي النص يدوس على كرامته ورزقه وأهله لو لزم
    وعليه أي نوع من البلطجه أخطر على المجتمع؟

    ReplyDelete
  8. لا والله .. ده مستحيل نقبل بالكلام ده .. ولازم زي ما كنا بنتحرك أيام الزفت العادلي نتحرك للزفت العيسوي .. هي ثورة ورق ولا إيه

    الناس الغلابة دي مسئوليتنا وأهلنا .. ووالله سواق التوكتوك ده عندي برقبة أتخن تخين في الداخلية .. كفاية انه راجل شريف وبيجري على رزقه بشرف .. مش انسان منحط و متسلط زي كلاب الداخلية

    وعودة للشغل من تاني

    ReplyDelete