تدوينة موجهة

طيب علشان نبقي واضحين : في البداية أرجو محدش يفهم كلامي ع إنه مزايدة علي حد ولا تنظير ، أنا للأسف الشديد لقيت نفسي مضطر أوضح موقفي م اللي بيحصل بالرغم من إني وضحت موقفي قبل كده وكتبت الكلام داه :

https://www.facebook.com/malekadly/posts/10201184834438924

لكن هقول تاني : المحامين الحقوقيين ليهم شوية طباع في شغلهم مرتبطة بإن أصل شغلنا هو المحاماة والقانون ودا طول الوقت بيخليك تشوف الحاجات بعين ممكن تبقي قاسية شوية ، محايدة ، واقعية ... سميها زي ما تسميها المهم إن دا مبيبقاش بغرض إنتقامي ولا أي شئ لأن إنحيازاتنا طول الوقت هي للمقهورين والمظلومين ، النهارده حصل الموقف داه : 

http://www.albedaiah.com/node/42981 

ممكن تبقي بتزايد براحتك بس حتي الزملاء اللي تغلبوا علي انحيازهم الشديد للثورة وموقفهم العدائي من الإخوان بسبب جرائمهم علي مدي عام أو أكتر وراحوا المشرحة وللا التحقيقات اترفض حضورهم ، يعني انطردوا بالبلدي وبالتالي بقي فيه موقف واضح من حضور المحامين الحقوقيين ودا لأكتر من سبب مش وقت كلام عنهم دلوقت ، بس يا ريت الناس تفتكر إن موقفنا طول الوقت من الإسلاميين كان منحاز لحقوقهم كبشر ، كنا ضد محاكمتهم عسكريا (زي خيرت الشاطر وحسن ومالك وغيرهم) ، كنا بنقضي معاهم ف النيابات بالشهر والشهرين لكفالة حقهم في محاكمة عادلة ومنصفة وكنا بنعرض نفسنا لمخاطر عديدة من قبيل إننا نضطر نفتعل مشاكل أو نتخانق مع بتوع الحراسات الخاصة وأحيانا نشتبك بالأيدي علشان بس تطمن المقبوض عليهم وعلشان ميخافوش ويحسوا إن فيه حد موجود معاهم بجد مش سد خانة ( قضية تنظيم الزيتون وخلية حزب الله مثالا )

وحتي في الشارع كنا بنتظاهر ونعتصم علشانهم ( اعتصمنا قدام مكتب النائب العام سنة 2009 لحد ما عرفنا متهمي خلية الزيتون محتجزين فين وقلبنا الدنيا وقتها ) .... اتظاهرنا لما البلتاجي وحازم فاروق اتقبض عليهم من سفينة الحرية اللي كانت رايحة غزة

وإثناء الموجة الأولي للثورة وما تلاها مكنش عندنا خيار وفقوس ، وكنا دايما بنبادر ومبنستناش حد يجيلنا لحد عندنا كما هو متبع في شغل المحامين .... وأثناء كافة أحداث الثورة ... وهنا عايز أقوللك : مش مشكلتي إن حضرتك مش محامي ومش مشكلتي إن دور المحامي أحيانا أهم من دورك بكتير باعتبار طبيعة عمله ، بس إوعي تنسي إن فيه ناس مننا قضوا شهر العسل بتاعهم في المشرحة ، شفنا جثث واضطرينا أحيانا علشان التغلب علي رخامة المحققين إننا نحط إيدينا ف قلب الجثث علشان نثبت صحة كلامنا وحقيقة إصاباتهم ، كنا ف مشرحة محمد محمود وماسبيرو ومجلس الوزراء وعصام عطا وغيرهم ، حضرنا تحقيقا بعدد شعر راس حضرتك ، شفنا مآسي وأهوال ممكن متستحملهاش ، حياتنا الخاصة اتفرمت ، أصغر قضية اشتغلها حد فينا كان عدد صفحاتها 1500 ورقة ،  كلنا بقي اتشتمنا واتخوننا واتزايد علينا من طوب الأرض ، وبرضه موقفنا متغيرش ... 
الدم كله حرام آه بس الفرق بيني وبينك إني مبعرفش أساوي بين دم القاتل ودم المقتول ، إنت حلو ومتابع ع تويتر وبتكتب ع فيس بوك وانحيازك واضح للقضية ف كل حتة بس في النهاية الفرق بين بعضنا وبينك ممكن يبقي زي الفرق بين اللي عالجبهة واللي بيشتغل ف سلاح الخدمات الطبية أو الموسيقي العسكرية .. أكيد الضغط علي الإتنين مختلف وتقديرهم للموقف مختلف واللي هيشيل طين طول الوقت هواللي عالجبهة ، فيا ريت نراعي داه ونبطل مزايدة وبالرغم من إني وضحت موقفي قبل كده بس عايز أقوللك إن محامين حقوق الإنسان مهماش محامين سلالم ولا مطلوب منهم يحضروا مع كل متهم ف الجمهورية ، شغلنا بيبتدي فقط لما يحصل انتهاك لحقوق أي متهم ، وبالتالي مش مطلوب مني أحضر مع قاتل مثلا ولا أتضامن مع قناص ولا شخص بيروع آمنين أو بيقتل أطفال ، وبرضه أنا مفرحتش ولا شمتت باللي حصل في الحرس الجمهوري وشايف إنه أكيد كان فيه وسيلة أقل عنفا من كده بس برضه قادر أشوف إن دي قوات حرس جمهوري يعني مينفعش أصلا تتعامل مع مدنيين لأن النتيجة أكيد هتبقي مجزرة ، وقد كان ، حاولنا نبذل مجهود لمساعدة الناس بس الناس رفضت وبالتالي مقدامناش غير إننا ندعي للمتوفين بالرحمة ولأهاليهم بالصبر ونفضل نقاتل من أجل عدم استخدام العنف المفرط ونقاتل ضد الظلامية والجهل اللي ممكن يخلي شوية إرهابييين يستخسروا دم الشباب للدرجادي ويسوقوهم للموت ولمعارك غير محسوبة كل أطرافها خسرانين .