بمرور الوقت ومع قليل من التأمل والانفراد بالذات روحك بتتحول لجدارية مكتوب عليها كل تطورات حياتك بحلوها ومرها ... الحزن واليأس متلازمة الناس اللي بتقدر تقري الجدارية دي لأنهم بيعرفوا ببساطة ان حياتهم عباره عن دواير جنب بعضها وانهم بدون سبب محدد بس حقيقي بيتشالوا من دايره لدايره بمجرد ما اللفة تخلص ، بدون وعي تقدر تتنبأ بنهايات كل الحاجات علشان هيا حصلت قبل كده وانتهت كده ... بس العشوائية في الإنتقال بين الدواير اللي فيها كل تفاصيل حياتك بتحسسك علي غير الحقيقة ان دايما في جديد بس لو بتعرف تقري جداريتك هتكتشف الخدعة وانك مش ماشي في خط مستقيم أو معوج انت في دايرة ...كمان في نتايج بتكتشفها منها ان البراءة والنقاء دول مش موجودين غير في الدايرة اللي ماكنتش فيها تقدر تاخد قرار وللاسف الدايرة دي هيا الوحيدة اللي مش بترجعلها تاني علشان كده دايما تدور عليها في الصور ودا سبب انك دايما بتنبش ألبومات صورك وانت صغير ( علي فكرة كلمة تنبش أنا قاصدها علشان للاسف الذكريات بتموت هيا كمان ومقابرها هيا الصور ) ... الزمن : مش مهم غير بره الدواير وبالتالي مع استمرارية انتقالك من دايرة لدايرة وعدم احساسك بالاطمئنان وانت بره الدايرة بيفقد الزمن أهميته ومش بتحس بيه غير في الشعر الأبيض ، التجاعيد ، قدرتك المتناقصة علي الضحك الصافي ، طعم الأكل ، الوجع الوجع : من الحاجات اللي عمرك ما بتقدر تتوصل لإحساس واحد ليها ربما لإنك بتبقي مصمم تنساه النسيان :تصرف لا إرادي بيحصل علشان انت مش بتبقي في الدايرة اللي انت عايزها علشان انت مالكش حق الاختيار الاختيار : فيه كدبة دايما بنقنع نفسنا بيها وهيا اننا أحرار في اختياراتنا بس الحقيقة دي حاجة مش بنعرف انها حقيقية أو مزيفة غير واحنا علي فراش الموت الموت : حاجة مش بترعبني بس لما بفتكرها مش عارف ليه بحس بحنين جارف للنومة الطويلة اللي المفروض مش هصحي منها وكمان بحس برعشة في جسمي كله ، حاجة كده تشبه احساسك لما بتيجي تحت الدوش فجأة المفاجأة : وهم دايما بتلجأله علشان تحس ان في حاجات جديدة في حياتك مثلا انت دايما بتنجح في حاجات كتير وبتبقي واثق من النتيجة اللي المفروض انك متعرفهاش بس كل مرة بتتفاجأ لما تعرف انك نجحت وتتنطط وترقص وكأن نجاحك المتوقع بالنسبالك كان شئ مجهول المجهول : الحاجات اللي مبتقدرش تشوفها دايما بتخوفك حتي لو كنت عارفها ،مثلا انت حافظ كل تفاصيل اوضتك بس لما بتطفي النور أقل صوت بتسمعه بيرعبك والمجهول مجرد احساس بتقنع نفسك بيه ان في حاجات متعرفهاش بس الحقيقي ان المجهول عمره ما بيجيلك وان انت المفروض تروحله لو عاوز تعرف المعرفة : الحاجة الوحيدة اللي بتخليك كالعير في البيداء يقتلها الظمأ والماء فوق ظهورها محمول ... كل حاجة عايز تعرفها موجودة جواك وبالرغم من كده عمرك ما بتعرفها من جواك مع ان الحكاية محتاجة بس شوية تأمل التأمل : رياضة مش ممكن تمارسها غير وانت في وسط الدايرة ولأن مكانك دايما عشوائي فمش بتقدر علي الرياضه دي غير لو قدرت تحدد مكانك المكان : انت نفسك عبارة عن شوية أماكن لو قدرت تجمعهم مع بعض تقدر ترسم صورة حقيقية لنفسك تخليك تحدد مدي جنونك الجنون : كل واحد مننا مجنون بطريقة أو بأخري بس المهم جنونك مختلف وللا زي اللي حواليك
No comments:
Post a Comment