Wednesday 12 January 2011

مصر الفشيخة لي وطن


ميرسي يا رب انك خلقتني مصري .. بصراحة هيغمي عليا من كتر الامتنان ... كل ما ابص عالناس بتوع تونس الكخة اقول ميرسي يا رب ... قال انتفاضة قال بسبب واحد ولع في نفسه معقول ينتفضوا علشان واحد مات كافر !!! إخيييييييه علي دي شعوب .. أنا بقي فاكر آلاف من حوادث الانتحار في مصر 
بس علشان احنا شعب مؤمن وصابر مش ممكن يحصل عندنا قلة الأدب اللي فتونس دي ... يعني واحد يولع في نفسه م الفقر والجوع يقوموا يدوروا الضرب في الشرطة وقال إيه يطالبوا بسقوط رئيس الجمهورية .. بقي دا اسمه كلام يا توانسة والله ما كانش العشم .... احنا عندنا ف مصر واحد من أعلي معدلات الانتحار في العالم يعني بالصلاة عالنبي زينا زي الدول الاسكندنافية اللي برضه عندهم معدلات انتحار عالية بسبب الرفاهية آي نعم احنا مش رفاهية قوي بس مينفعش حد يتبقي متقدم علينا لأننا أبدا ما بننساش ان مصر هيا مزة الأمم علي راي خطيبتي ... طيب ممكن يكون زين العابدين بن علي مأفور شوية وعلشان كده التوانسه مبئوئين منه أو ربما تكون ظروفهم أسوأ من مصر بمراحل ؟ ناس بتتدلع معدل الفقر عندهم 3,8% بينما معدل الفقر عندنا وصل إلي 41% يعني بحسبة بسيطة نلاقي اننا عندنا ف مصر 35 مليون بني آدم بيعانوا من الفقر يعني تلت أضعاف عدد سكان تونس كلها أي أنهم مالهمش حق والله ... طيب نشوف مثلا الحد الأدني للأجور عندهم نلاقيه 994 جنيه بينما الحد الأدني للأجور عندنا اللي لسه ما اطبقش هيبقي 400 جنيه حتي ف دي مالكمش حق يا توانسه .... طيب يكونش بن علي زودها معاهم شوية وطابق علي نفسهم ؟ الراجل بقاله بس 23 سنة رئيس بينما الريس بتاعنا ربنا يطوللنا ف عمره ماشي في ال 31 سنة حكم ... طيب تكونش مشكلة ارتفاع أسعار ؟ تخيلوا التوانسة الكفرة اللي بيتبطروا عالنعمة كيلو اللحمة عندهم في رمضان اللي فات كان يوازي 48 جنيه مصري بينما عندنا في مصر المحروسة برضه في رمضان اللي فات كيلو اللحمة وصل سبعين جنيه يبقي واضح كمان انها مش حكاية اسعار .. أمال إيه الحكاية يكونش الفساد المستشري عندهم ؟ خد دي : تقرير منظمة الشفافية العالمية لسنة 2010 بيقول إن تونس في المرتبة 51 بينما مصر في المرتبة 71 من حيث الدول الأقل فسادا في العالم أي أن معدل الفساد عندنا أعلي من عندهم بكتير .... طيب إيه الحكاية ........... أنا عرفت التوانسة ثاروا ليه واحنا لاء ؟
معندهمش تكاتك ولا حسن نافعة ولا اسم النبي حارصه  البرادعي ولا البرنس حسين مجاور ... وكمان معندهمش برلمان موازي الذي يعتبر هو الطرق الصحيح للعصيان المدني ... مش طريقتهم الهمجية دي في الاحتجاج .

3 comments:

  1. هههههههههههه
    جامدة يا مالك
    تسلم ايدك
    بس عايز اقول ان التوانسة عدوا مرحلة مهمة وهي مرحلة ايجاد مؤسسات مجتمع مدني تعبر عنهم
    يعني الى حد ما عندهم مؤسسات بديلة تعبر عنهم
    نحن في اكبر احتياج لإيجاده
    نحن نحتاج لترتيب وتنظيم انفسنا بشكل ما

    ReplyDelete
  2. This comment has been removed by the author.

    ReplyDelete
  3. أشك يا عمدة ... وحتي لو نظمنا انفسنا انت ناسي ان عندنا الخروج عالحاكم حرام ؟؟؟ :)

    ReplyDelete