كل ما تتلفت حواليك مبتقدرش تشوف غير اللون الاسود ... كلام اللي حواليك إسود ، أفعالهم سودا ، مشاعرهم سودا ، قلوبهم سودا ، القادم أسود .... مساحة التفاؤل في حياتك بتقل بشكل مخيف .... بقت تنتابك أحاسيس موت ، لما تنام بيبقي في دماغك انك مش هتصحي تاني علشان كده مصمم تشرب سيجارة فبل ماتروح في النوم وتسمع أغنيتك المفضلة وتشوف كل الوشوش اللي بتحبها ولو حتي عن طريق التذكر ...بتهف عليك ذكريات طفولتك أيام ما كنت نقي وحر بجد مش مجبر تعرف حد مش بتحبه ولا مجبر تردد كلام فارغ زي البغبغان علشان محدش يفهمك غلط .... مفيش حاجة حواليك بقت بتشدك زي الأول لا الرقص ولا المزيكا ولا السهر ولا قفشات صحابك ولا أصحابك نفسهم.... بقيت تحس انك زاهد في الدنيا أو غريب جاي زيارة يومين وماشي وعلشان كده مش عايز تربط نفسك بحاجة ولو ربطت نفسك بحاجة أو بحد بيبقي سبقك للجانب الآخر من النهر .... بتحب الجانب الآخر من النهر هناك الشاشة السودا هتنطفي ويمكن لاء بس عالأقل عندك أمل ... عندك أمل انك هتستني الشمس علشان هتحب تشوفها وقت الشروق ، عندك أمل ترجعلك ضحكة وحشتك من زمان ، عندك أمل في حاجات كتير .... بتفكر دلوقتي بجد امتي تلاقيك عالجانب الآخر من النهر بعيد عن كل القرف اللي حواليك وبعيد عن الحزن والكآبة والآمال الزايفة أو عالاقل بتتفرج عليها ومنتش جزء منها ..
No comments:
Post a Comment