57634

مكتب بريد الحارة المزنوقة

يسلم ليد السيد / رئيس أهله وعشيرته

عزيزي رئيس أهلك وعشيرتك ، بداية أنا عايز اقوللك إني علشان أكتبلك الكلمتين دول تعبت قوي ، الكهرباء قطعت واللابتوب فصل شحن ، وفجأة كل اللي كنت عايز أكتبهولك اتبخر ، ولما الكهرباء جات يا مؤمن السخان ضرب .... إلخ سلسلة عجائبية من الحوادث الصغيرة المتتابعة اللي ممكن تخرج أي حد عن شعوره .. بس أنا صممت أكمل الرسالة ، وبعد :

5

تقول الاسطورة إنك رئيس ومدني ومنتخب ، وتقول الاسطورة أنك أستاذ جامعي متميز وإنك راجل بتاع ربنا .... ف الحقيقة أنا مش مصدق حاجة من الكلام داه :

الرئيس: ف بلد زي بلدنا لازم يكون بمفهوم الناس (مش أنا طبعا لأنه بالنسبالي موظف بس أنا مضطر أحاول أتكلم عنك من وجهة نظر الناس شويتين) ملو هدومه ، وبصراحة أنا عايز أقوللك إن بالمعني الحرفي للكلمة إنت مش ملو هدومك لأني لاحظت إن بدلك معظمها واسع عليه ولازم تشوف حد بيفهم يلبسك (البدل طبعا) ، وطبعا لازم تلاحظ إنك مش مقنع يعني مبتقولش كلام ينفع الناس تصدقه وحججك فارغة وواضح إنك مش مسيطر ، يعني لا داخلية ولا قضا ولا جيش ولا حكومة ولا شارع ولا يحزنون ، كل اللي بتعمله إنك كل شويتين تطلع تطرش علينا وحيث إنك مغناطيس كوارث فالناس بتنشغل بالحوادث والمشاكل اللي بتحصل حيثما وجدت حضرتك وتنساك تماما ... وطبعا كلامك مستفز شويتين وبتلك لما تشبع وكأنك فيه علاقة عاطفية بينك وبين الميكروفون فبتتلخبط كتير..بس قشطة دا تمامك وأنا مش منزعج بس حبيت اقوللك

المدني: انت تقريبا كل علاقتك بكلمة مدني إنك مهندس "ومدني أحد تخصصات الهندسة"

المنتخب: طبعا فكرة إنك ناجح بالإنتخاب دي بتفكرني ببلدياتنا اللي دخل الإمتحان لوحده طلع التاني ... يعني المنافس بتاعك أهبل ومكانش ينفع ينجح أصلا فاللي انتخبك انتخبك غصب واقتدار ... وطبعا مش هعايرك بموضوع الليمون بقي وكده بس انت أكيد منسيتش

الأستاذ الجامعي: بالنسبالي الأستاذ الجامعي راجل بتنعكس طبيعة عمله علي شخصيته ، يعني رجل مرتب ومنظم ودقيق وأمين ويعرف الرجال بالحق لا يعرف الحق بالرجال ... ولو حاولنا نطبق عليك المواصفات دي هنرجعك تاخد ثانوية عامة من أول وجديد .

بتاع ربنا: يعني راجل مؤمن ، وعلي سبيل المثال حين سئل الرسول (ص) أيكون المؤمن كذابا ؟؟ قال لا .. أمال انت إيه ؟؟ قال رسول الله (ص) آيات المنافق ثلاث : "إذا حدث كذب وإذا وعد أخلف وإذا اؤتمن خان ".... طبعا إنت قلت مثلا إن حقوق الشهداء أمانة ف رقبتك ولكنك : كذبت وأخلفت وخنت ف جملة واحدة ومش هفكرك ببقية مصايبك .

7

تقول الاسطورة إنك (كرئيس) مستقل ف قرارك ، وإنك بتنام معيط ، وإنك مبتخافش ، وإنك حريص علي الفقراء ، وإنك ثوري ، وإنك بتحب البلد دي ، وإنك هتنهض بيها :

المستقل: الجملة الوحيدة اللي ممكن يتقال فيها إسمك ويتقال فيها إنك مستقل وأصدقها هي أن يقال : إنك مستقل سيارة

الباكي: فكرة إنك بتنام معيط كل يوم دي دي مقدرش أفهمها علي إنها معني لتقواك أو لأنك حاسس إن الحمل تقيل أو لأن أحوال البلد مزعلاك وكده ... بس بصراحة بفهمها علي أن هناك شخص ما بيكدرك كل يوم قبل ماتنام .. وأنا أحب أقوله "جود جوب".

الشجاع: أنا بس عايز أقوللك إنك بتخاف تسجد والحرس بتوعك مش محاوطينك وطبعا شكلهم كان وحش قوي وهما واقفين جنبك حافيين وشكلك كان أوحش لما خرجت م الجامع حافي ...إلخ فشجاعتك قادر أفهمها بس في إطار إنك عندك شجاعة أدبية تبرهن يوميا إنك مش كده خالص 

الحريص علي الفقراء: طبعا بعد موضوع كوبونات أنابيب البوتاجاز وتلت أرغفة لكل مواطن والناس اللي بقت تنتحر من اليأس ومشاكل المياه والكهرباء وحوادث القطارات عايز أقوللك إنك واضح إنك حريص علي إن الفقراء يموتوا جوعا أو دهسا أو غرقا

الثوري: متقولش علي نفسك كده انت حد جميل ... الثوري دا شخص منتمي للفكرة بكيانه كله ومستعد للتضحية من أجلها مهما كان التمن ، شخص عنده مبدأ .. وبالمنطق داه فإنت علاقتك بالثورة زي علاقة طواشي بست الحسن والجمال ... آخرك تحسس ، مبتعرفش يعني

المحب: موضوع إنك بتحب البلد مش عارف مين ابن اللذين اللي طلع عليك الإشاعة دي ؟؟ المحب دا شخص ليه مواصفات معينة ، منها مثلا : إن المحب لمن يحب مطيع .. ولو طبقنا عليك المعيار دا هتطلع أستغفر الله العظيم بتحب راجل ، هوا آي نعم بديع وشاطر بس ف النهاية دا راجل زيك يا بيه ودي حاجة حرام

الناهض: طبعا فكرة إنك هتنهض بالبلد بعد كمية الانهيارات والحوادث وغلاء الأسعار وتسليم البلد تسليم مفتاح للأجانب والأشكال اللي بتشحت علينا منها متنفعش نهضة خالص .. وبالتالي لما بيقولو عليك بتاع نهضة اللي إسم الفاعل منها ناهض يعني مبيجيش ف دماغي غير ناهض شريف

وبكده أكون وصلت لنهاية الجزء الأول من خطابي ، وان كان ليا عمر ابعتلك الباقي 634 لما أفضي .

إمضاء

واحد بيعمل حاجة غلط.