الثورة لا ملكك ولا ملكي ..ملك اللي يومها سند صدره عالسونكي

 ليه حضرتك لازم تنزل يوم 8 يوليو ؟ علشان اللي مات علشانك مش ابن البطه السودا وعلشان حقه وتاره ف رقابتك ..فياتجيبله حقه يا تموت فدا دمه زي ما هوا مات فدا حياتك ... أمك مش احسن من امه ، والنار اللي قايدة ف قلبها لو مبتحرقكش تبقي مش بني آدم . لازم تنزل علشان كلاب النظام راجعة من كل بلاعة ف مصر وفجأة بقينا احنا مش شباب 25 يناير وبقيت لو شعرك اتنعكش بلطجي وبتتشحن عالمحكمة العسكرية ، وبقينا محرضين وضد مصلحة الوطن ، وأهالي قتلي الداخلية يتكرمو وأهالي الشهدا ينضربوا ويتهانو ، ومجلس المخلوع  اللي معينه المخلوع بنفسه شغال الله ينور هوا والأمن الوطني وكل كلاب النظام الوسخ اللي خرجو م البلاعات شوية فتنه وشوية فئوية وشوية شرعية وعمالين يجرجرونا ف معارك معفنه زيهم ، الانتخابات والدستور .... إلخ ... وفجأة نصحي علي مهرجان البراءة للجميع الحرامية ياخدو براءة والثوار ف السجن الحربي ، وكلاب الداخلية اللي قتلو الثوار اخلاء سبيل ويطلعلك واحد يقوللك الشرطة كانت بتدافع عن نفسها !!! ومحدش بقي عارف مين فين ليه وكل كام ساعة قضية تعذيب جديدة ف سلخانة من سلخانات الداخلية ... و لافي عدالة اجتماعية ولا حرية ولا تغيير ودي طلباتنا اللي متنفذش منها حاجة للنهارده ..وهتتنفذ يعني هتتنفذ ..وبعد دم الشهدا اللي سال علشان خاطري وخاطرك وفدانا كلنا مبقاش عندنا رفاهية الاستسلام و الخنوع أو حتي اليأس ولا الخوف .. والجمعة 8 يوليو مش مليونية ولا كارنيفال علي فكرة ..اعتصام زي بتوع زمان تيجي وتكترنا ونتآنس انا وانت ببعض لجل عيون ام الشهيد ولجل الغلابة المطحونين ولجل الثوار المحبوسين ولجل ننضف بلدنا بجد ..الاعتصام اللي فات نضفنا الأرصفة والشوارع بس الاعتصام دا مش هنمشي منه غير لما ننضف بلدنا ومؤسساتها ومحاكمها ومجالسها من كل الديدان اللي سارحة وبتنخر فيها وفينا ..مبارك لازم يتنقل السجن ولازم يتحاكم محاكمة علنية وجمال وعيلاء علي أقل تقدير لازم يطلعو ف برنامج خلف الأسوار نشوفهم مذلولين قبل الإعدام وندمانين عاللي عملوه فينا هما وكلابهم وابوهم وقتلة الشهدا لازم يرجعو للسجن ويتوقفو عن أعمالهم وأي كلب بيدافع عنهم لازم ياخد بالشبشب علي دماغه والمصابين وأهالي الشهدا لازم ياخدو تعويضات مناسبة للي قدموه للبلد .. ولازم الحد الأدني للأجور يبقي زي ما طلبنا مش زي ما سيمير ردوان قال ولازم يبقي فيه حد أقصي للأجور ... والبلد دي لازم تشوف النور ونشوفه معاها ... مستنيينك ف التحرير من النهارده علشان تأدي الأمانه وتحني أم الشهيد بإيديك وتروح تبوس ايديها وتقوللها انا هنا علشان حق أخويا يا أمي .. وتقول للغلابة ف البلد دي أنا منكم وانتو مني ....ولسه النظام مسقطش