تحديث بخصوص حادثة تعذيب مواطن بقسم شرطه ثالث الإسماعيليه..الداخليه وسنينها 2

لما كتبت عن الحادثه دي مكنتش شفت غير الورق والإيميل اللي نشرته زي مجاني ..القضية بيشتغلها زميلنا أشرف عباس محامي هشام مبارك ف الإسماعيليه ..والنهارده وصلني من نجل الضحيه فيديو بيوضح بعض إصابات والده ... أهه واحكمو انتو بقي
  http://www.youtube.com/watch?v=PpSeP366wBg

جاتكو نيله مليتو البلد

حاجه وسخه بكل معاني الكلمه انها تبقي ماشيه ومبسوطه يمكن علشان لسه سايبه حبيبها أو جوزها أو عملت حاجه لطيفه ف شغلها أو أو أو...... ويمكن تكون زعلانه أو فيه حاجه مضايقاها وفجأه وهيا ماشيه ف الشارع تلاقي خنزير بياكلها بعينيه أو بيتحرش بيها بلسان أوسخ من مجاري الحكومه أو حتي يحاول يلمسها بإيديه.. لو محجبه تلاقي جحش بيقول مهيا ماشيه بتدلع ولو مش محجبه تلاقي حمار يقوللك مهيا بتجيبه لنفسها ولو كانت منقبه يقوللك فيه واحده منقبه تحط كحل!!! المهم ان ابن الشرموطه صاحب الرأي اللوذعي ف ضحية التحرش بيفكر في كل حاجه إلا إنه يدافع عنها او ينهر اللي بيعمل كده!! وأنا فعلا مش فاهم ليه...مره حد قاللي دي مهمة الشرطه طب فعلا أكتر ناس شفتهم بيتحرشو هما كلاب الداخليه في أوقات كتيره جدا... بس عايز بقي الكلاب اللي بتبرر التحرش تحت أي طرف يتخيلو ان واحد منهم ماشي ف الشارع لا بيه ولا عليه وتيجي واحده تقوم محسسه مثلا ع مؤخرته أو واحد يبوسه ويجري مثلا..يا تري ساعتها هيبقي شعوره إيه ؟ويا تري هيلتمس نفس المبررات والأعذار للي غرفته مثلا ؟
ييجي جحش تاني يقوللي أصل الناس مكبوته جنسيا وهنا أسأله كرجاله ف بعضينا يعني وهوا بقي لما تبقي هيجان ومكبوت وعايز تنط علي نفسك فالحل انك تشتم واحده معديه من قدامك أو ترزعها كلمتين وسخين زيك أو تلمسها وتجري !!!إيه الفرق بين الكبت الجنسي والهطل يا كابتن ؟؟
الموضوع بتاع التحرش دا فعلا بقي مشكله ليها علاقه بإن الشوارع بتشغي بالمعاتيه وإن عندنا شرطه وسخه آخر حاجه تفكر تعملها انها تشتغل وعندنا ناس جبنا وبيهربو من جبنهم بأي كلام ميعديش علي عيل صغير... والتحرش دا مرض علاجه الضرب بالشبشب في منتصف الدماغ بالظبط واللي بيبرره يبقي عايز حاجه أرفع م الشبشب في حته تانيه لامؤاخذه لأنه كائن وسخ
من حق كل واحده تلبس اللي هيا عايزاه وتعمل ف نفسها اللي هيا عايزاه لأن دي أبسط قواعد الحريه ومش من حقك تتعرضلها بأي شكل أو تسمح حتي بكده أو تلاقيله مبرر لأن دي أبسط قواعد الاحترام...ولو انت بتئذيك مناظر الستات قوي سواء كانوا مش محجبات أو محجبات أو حتي منقبات ابقي غمض عينيك يا علئ أو أقوللك دورلك علي أوضه بعفشة مياه ف جنينة الحيوانات
طبعا كلامي دا موجه للعرر فقط.. جاتكو نيله مليتو البلد

Published with Blogger-droid v1.7.1

الداخليه وسنينها 2

الإيميل داه جاني زي مهوا كده .. صححت فيه بس شوية أخطاء لغوية ، وطبعا الكلام حقيقي لأني قابلت ابن الضحيه في مركز هشام مبارك للقانون واطلعت علي كل الأوراق اللي بتثبت صدقه وكمان محضر الشرطه والتقرير الطبي الخاص بوالده :

الاسم . عماد الدين احمد محمود  -  53 عاما - من محافظة البحيرة مركز ايتاى البارود - موظف بالهيئة القومية للتامينات والمعاشات بشمال سيناء

خرج فى مأمورية تابعة الى العمل الى الإسماعيلية والقاهرة ترك سيارته فى الإسماعيلية  للتصليح بأحد الورش بالإسماعيلية وذهب لينهى مأموريته فى القاهرة وعاد إلى الاسماعلية لينهى مأموريته ويأخذ السيارة  من الإسماعيلية ذهب الى طريق البلاجات وهناك (تعرض لحادثة تعدي من قبل أشخاص مجهولين تسببت في إصابته في انفه ورأسه من الخلف ) تجمع الناس وحضر ضابط من الجيش وفتح السيارة فرأوا المظروف الخاص بالمأمورية وتأكدوا من صدق كلامه حيث أن حادثة التعدي تسببت في ضياع رخصته وبطاقته الشخصية ومفاتيح سيارته وقام ضابط الجيش بالإتصال بسيارة إسعاف لنقله للمستشفي العام وتم إسعافه وخرج من المستشفى على قدميه وكان هناك آثار دماء على قميصه بسبب نزيف رأسه وأنفه  فقام بتوقيف تاكسي امام البوابه لتوصيله إلي مدينة العريش نظير المبلغ الذى يطلبه لأنه لا يقدر يقود سيارته وكان مرهق من السفر فقال له سآخذ 300 جنيه فأعطاه المبلغ الذي طلبه وبعدها اخذ يسير لمده عشر دقائق به فى البلد وفوجئ به أمام قسم شرطه ثالث الاسماعلية وأنزله من التاكسي وسلمه إلي أمين شرطه قائلا حفلتك يا باشا واتهم الرجل بأنه لص وحاول ان يغرر به ليسرق منه السياره فقامو بالقبض علي الرجل وكلبشوه فى القفص الحديدى مع العلم انه كان لا يوجد بالقسم سوي 3 افراد لدخول فترة اليل كلبشوه فى القفص وانهال امين الشرطة عليه ضربا بيديه وقدميه وبأوسخ الشتائم فقال له عماد انا رجل محترم واعمل بالمعاشات وابني فى حزب الغد ومن شباب الثورة أنا مش مجرم انت بتعمل معايا كدا ليه ؟ فنهال عليه بالضرب اكثر واكثر وكان يخرج مطواه من جيبه ويخدشه فى جنبه او فى ظهره ويهدده بالطبنجة الميرى والملازم موجود يشاهد ويستمتع وفى نفس الوقت عماد كان لم يأكل ولم يشرب منذ اكثر من يوم اتسلو عليه طول اليل وعندما كانت عيناه تغفل من كثر التعب والضرب كان يفاجئه برعب سواء بالطبنجة فوق راسه او بقدمه او بيداه وحينما حضر العسكرى الخاص بالنظافة فك الامين الكلابش وقال له ياله يابن .... اكنس القسم والعسكرى يضربه ليكنس وهو لا يقدر ان يرفع يد او يمشى حتى بقدمه تعامل معه هؤلاء كأنه يهودى وأجبروه علي كنس القسم وتنظيفه بالضرب ثم عاد وكتب امامه المحضر فى يوم 7 /5

وكان يفبرك له الكلام ثم اخذه الى المستشفى وكتب له التقرير ووقعه من الطبيب وهو فى الخارج لا حول له ولا قوة ثم عاد به الى القسم قبل ان يعرضه على النيابه دخل الى الحوش المحيط بالقسم وقالو له لو ما قولتش ادينى الحقنه بسرعة ارجوك محتاج الجرعة سوف نضربك اكثر يابن ....... وهو لا يعى هذا الكلام فانهالو عليه ضربا على الاقدام وعلى الظهر من فوق وتحت واخرج له امين الشرطه عضوه الذكري وقال له "مص" فقال له اقتلني اولا المهم اخذه الى النيابه وكان معه سائق التاكسى ربنا ينتقم منه وكان عماد فى حاله لا يرثى لها امام النيابه لدرجه انه كان شبه فاقد الوعى وكانت كلمته محصلش انا موظف فى المعاشات ومقيم بالعريش اخلى سبيله وكيل النيابة من القسم ان لم يكن على ذمة قضايا أخرى... دخل القسم مرة اخرى فودعه أمين الشرطة بضرب شديد وتركه وهو لا يقدر ان يخطو خطوه ولا يدرى بنفسه ... وأفاق ليجد نفسه فى مستشفى الزقازيق وعندما حضرت انا ابنه تحريت عن الموضوع كان قد حجز فى مستشفى الجامعة لمدة ثلاثه ايام وهو يعانى من اصابات بالغة  ذكرها التقرير الطبى وذهب هو الى المستشفيات بالتسلسل 1 الاميرى 2 الجامعة 3 الزقازيق 4 مستشفى السلام الدولى والمستشفيات الثلاثه الأولي اهملو فى حقه واجرت له مستشفى السلام الدولى 5 عمليات صعبه جدا منها عمليه تثبيت فى كف يده بسبب الكلابش الذي علق به فى القفص واصابات كثيره مذكوره في التقرير  منها كسر بالفقرات القطنيه ومن جراء الذى حدث سمعت زوجته كنا قد اخفينا عنها فهرولت الى المستشفى وهى تخطو الطريق صدمتها سيارة اجره فماتت فى الحال وهرب سائق الاجرة وحرر محضر بذلك واخيرا نقل إلي مستشفى دار السلام بدمنهور والمستندات الموجودة و التقارير الطبيه بالتسلسل من يوم الحادث الى هذه الساعة  97 اشاعة . محضر قسم الشرطه الفاسد تصوير للاصابات التى تعرض لها ...باع هذا المجنى عليه سيارته وبيته وجلس اولاده فى شقة ايجار وعم الخراب بسبب الشرطة الفاسدة التى لا زالت موجودة

المرادي الضحيه مش بلطجي ولا سواق توكتوك ولا ميكروباص ولا اتعدي علي ضابط شرطه ولا مطلوب في أحكام... يا تري رد الداخليه هيكون إيه ؟؟

فقط في مصر : الموت يأتي مرتين

امبارح كنت خارج من بيتنا لا بيا ولا عليا ومعنوياتي عال العال .. عرفت من تويتر ان فيه جنازة ل 19 من شهداء الثوره المصريه مقدرتش السلطات تتوصل لأهاليهم أو تعرف أي حاجه عنهم ولقيتني ممكن ألحق الجنازة .. فيه حد يتأخر عن جنازة اخواته اللي عاشوا وماتو ميعرفهمش بس ماتو علشانه ؟

وطول الطريق كنت عمال اقول يا تري هيبقي فيه هناك كام ألف بني آدم بيشيعوا الأبطال دول ويا تري من الزحمه هقدر ابوس نعوشهم ورجولهم وقعدت اقول يا رب سهل علشان أنا لو ما عرفتش أبوس رجل كل واحد فيهم هيحصللي حاجه ... ساعات بحس نفسي مأفور في مسألة الموت والمرض دي أنا حتي مبحبش أعزي ولا اروح المقابر بس انتو يخواتي لاء هاجي انشالله زاحف ... وصلت المسجد لقيت قدامه حوالي عشرين تلاتين واحده ست من أهالي المنطقه وكام كاميرا تليفزيون المهم دخلت المسجد لقيت مشهد رهيب خلاني خرجت فورا لأني مستحملتش ، جزء كبير من أرضية المسجد متغطي بنعوش اخواتي والنعوش ملفوفه بعلم مصر .. فجأة لقيتني رجعت تاني ليوم 28 يناير والأيام اللي بعده ومنظر الناس وهيا بتقع وملامحها بتبتسم وكأنهم بيقولو وفينا الدين وعملنا اللي علينا كملو انتو بقي .. خرجت بره المسجد زي المتكهرب مقدرتش أكمل ووقفت قدام باب المسجد وابتدت النعوش تخرج واحد ورا التاني مشهد مهيب مقدرتش أعمل أي حاجه غير إني ابكي وأسلم علي كل نعش بإيدي والستات سكان المنطقه اللي حواليا ابتدو يعيطوا فواحده قالتلهم بتعيطو ليه زغرطو للعرسان ..فابتدو فعلا يزغرطو ودموعهم نازله ويهتفو : لا إله إلا الله الشهيد حبيب الله .. وواحده كانت في حالة شبه هستيريا عماله تقول بلا انقطاع ربنا يحرق قلب اللي حرق قلوبنا وقلوب أهاليكو عليكم ياولادي ...ابتدت قافلة النعوش تتحرك باتجاه مدافن البساتين والناس ف الشوارع اللي ف الطريق بتسأل وكل ميعرفو ألاقي واحده بتزغرط من هنا أو من هناك والناس بتوطي وشها ف الأرض لحد الموكب ميعدي من قدامهم ، وصلنا مدافن البساتين واتحطت النعوش عالأرض فرحت وقفت قدام المكان اللي هيندفنو فيه واستأذنت الراجل اللي جوه اني ابقي معاه قاللي بلاش علشان المدخل ضيق فابتديت اشيل مع الناس الجثامين من النعوش واتعمدت اشيل الجزء الأسفل علشان أقدر أبوس رجل كل واحد أو واحده فيهم وخلصت عملية الدفن واثنائها لقيت فيه واحد عرفت بعدين انه موظف من رئاسة مجلس الوزرا اسمه سيد أبو بيه بيعرف نفسه علي إنه من شباب الثوره وموظف بمجلس الوزرا بيتخانق مع مصور بيصور عملية إنزال الجثامين جوه المقابر وبيقولله دا مش إنساني ومأفور جدا وطبعا مكانش فيا دماغ أكلمه لأني كنت مشغول باللي بعمله .. وبعد ما خلصنا ابتدي صوت النقاش يعلي بين المصور وبين موظف مجلس الوزرا وزمايله والمصور بيقول ان دا تاريخ ولازم يتصور مش كفايه الناس بتندفن بشكل غير لائق وابتدي النقاش يتفرع والصوت يعلي .. ولقيت شابه عرفت بعدين انها سلمي الدالي بتقوللهم انتو مش مكسوفين من نفسكم يا فجره بتتخانقو علي إيه ؟ومتنرفذه جدا من اللي بيحصل ... كان حاضر عملية الدفن حوالي 100 واحد معرفش منهم غير غاده شهبندر وسلمي الدالي وبلال دياب والباقيين مصورين وصحفيين وعمال المقابر وعدد قليل جدا من الستات والرجاله ... المشهد هزني قوي خاصة وإن المقبره قذره ولا تليق بكلب يندفن فيها فما بالك بشهيد مات علشاني وعلشانك ؟ رجعت لقيت فيه جدل حوالين اللي ماتو دول شهدا وللا مساجين واستفزيت بشكل بشع وضغطي علي وابتديت أجيب دم من مناخيري .. ياولاد الكلب ياولاد الكلب الشهدا بيتشوهو بالشكل داه ؟ حتي لو كانو مساجين مش ماتو من غير ذنب مش ماتو علشان رفضو يخرجو م السجون ؟ وبعدين انا بحكم شغلي أعرف ان المساجين بياناتهم الكامله بتبقي موجوده في جهات كتير ف وزارة الداخليه يعني يسهل التعرف عليهم ويسهل الوصول لاساميهم وأهاليهم فأنا اصلا مش مصدق قصة انهم مساجين دي إلا لو كانو مقبوض عليهم أثناء الثوره وماتو تحت التعذيب أو كانو معتقلين سياسيين في كل الاحول هما شهدا وكوننا بنفرق بين الشهيد الحر والشهيد المسجون فدا عار لأنهم في كلا الحالتين ماتو علشان أو بسبب اننا بننتزع حريتنا ... فين الإئتلافات والأحزاب والوزرا وشباب الثوره اللي قربو يطلعو لنفسهم كارنيهات شباب الثوره ؟ فين العيال والناس اللي أكلت وشربت بدم الشهدا دول علي كل موائد الدنيا ؟ فين المصريين اللي طول عمرهم جنائزيين بالفطره ؟ ليه لم يتم الإعلان عن الجنازة والترتيب ليها بشكل لائق ؟ نكلم مجلس الوزرا يقولو كان فيه ممثلين من مجلس الوزرا وتكلم ائتلاف خولات الثوره يقوللك كان لينا ممثل حاضر الجنازه .... ممثل ياولاد الكلب يا رمم 19 شهيد تبعتولهم ممثل ولوا م المجلس العسكري تتحاربو علي مقابلته ويروحله عشرين لاء رجاله بجد والشهامه متوافره فيكم عالآخر ....تطلع شرموطه م الطب الشرعي تقول انهم مساجين ، مش الطب الشرعي دا برضه بتاع اللفافه ؟ بتصدقوه دلوقت علشان تعفو نفسكم من خيانة دم الشهدا ؟ يعني اللي يموت علشان البلد دي بقي محتاج شهاده رسميه انه شهيد ؟ ينهار ازرق ينهار ازرق الله يخرب بيوتكم الله يخرب بيوتكم ... بالنسبالي أنا شهدا وماتو علشاني وبست رحليهم واحد واحد وواحده واحده وحضرت جنازتهم ومش هنساهم ابدا وهسميهم وهخترعلهم قصص وأحلام وهحكي لولادي ولأهلي عنهم... بس عايز اقوللكم ان الشهيد ف البلد دي بيموت مرتين مره علشان حلمه وحلمنا ومره علشان انتو بتمرمطو بكرامته الأرض بالرغم من انكم بتاكلو وتشربو بدمه ... عادي مش جديده عليكي يا بلد ، مش الشهيد سليمان خاطر برضه هواللي موت نفسه ؟ عموما هسيبلكم الصوره دي علشان دايما تفتكرو قد ايه انتو بتحتفو بشهداؤكم وبتكرموهم

هكذا قلت لنفسي

لكي يرشدك النجم في معاركك
لا بد أن تخوضها بكرامة
لا تطعن أحدا من الخلف
كن رقيقا كالوردة
وصلبا كالسيف
سيف الشرفاء الذي لا ينكسر
تحت وطأة الكراهية
كن سريعا كالنسمة
تصحب معها هواءا باردا منعشا
ولا تكن كالريح العاتية
تجرجر ورائها أتربة تغشي الأبصار
كن واضحا كالنهار
وكن هادئا كليل عاشقين متيمين
وساعتها قد يدركك النصر
وإن أدركتك الهزيمة
فلا تبتئس
يكفيك أن كان النجم حليفك
وإن شربت نخبا فاشربه لأنك انتصرت
لا لأن غيرك قد انكسر
********************
الفروسية هي كراهية الانتقام
الفروسية هي مجافاة اللئام
الفروسية حياة بجوار الحياة
الحياة طريق الموت
حياة الفروسية طريق الخلود
جسد الفارس لا تقترب منه الديدان
روح الفارس لا تبلي
كلمات الفارس لا تنسي
حصان الفارس
لا يجفل ابدا ولا يركع ابدا
ولا يسقط فارسه إن كان حقا فارس
سيف الفارس
لا يصدأ ولا ينكسر
سيف الفارس يقضي علي الجسد
لكنه ابدا لا يقرب الروح
سيف الفارس يطهر ولا يلوث
سيف الفارس يسيل الدماء لكي يحقنها
الفروسية تنتزع ولا تمنح
لذا فلا تمنحها لأحد نكاية في آخر
واذا خلقت فارسا من لا فارس
فلا تنسي أن تتحسس رقبتك كل يوم
*********************
حياتك هي الطريق الوحيد لموتك
موتك هو قطارك إلي حرية الروح
هو موعدك المرجأ مع اللاانتظار
هو راحتك من عناء معايشة الأشباه
أشباه البشر
أشباه الفرسان
أشباه الأحبة
لو أنك فقط تعلم
أن موتك هو الراحة الأبدية
وأبدية الراحة !!!
فقط اتبع النجم
ولكي يرشدك
احرص علي أن تكون عين مياهك رائقة
اصقل مراياك بعناية فائقة
ولا تبحث عن موت غيرك
ولا عن غير موتك
إن تلحق قطارك بسكينة تسلم
*******************