دي ملاحظات سريعة جدا علي أول بابين في الدستور اللي سلقوه وعايزين
يأكلوهولنا بالعافية
1- المادة : 7 - لسه الدستور مصمم علي إن التجنيد يكون
إجباري لأي غرض ..يعني إبنك يتجند وبدل ما يقف عالجبهة تلاقيه برضه بيشتغل في
مزارع فلان وعلان أو بيمسح شقة مراة اللواء الفلاني
2- المادة :10 - لما يقول تحرص الدولة والمجتمع علي
الإلتزام بالطابع الاصيل للاسرة المصرية وعلي قيمها الأخلاقية يبقي لازم تسأل نفسك
إيه هوا الطابع الأصيل للأسرة المصرية ؟؟ اللي ف امبابة وللا اللي ف مصر الجديدة
وللا اللي ف الأرياف ؟؟ وليه حاطط جملة تحرص الدولة والمجتمع ؟؟ بتدستر جماعات
الأمر بالمعروف والنهي عن المنكر وبتدي شرعية لوجودها لزوم البلطجة علي مخاليق
ربنا ؟؟
3- المادة :12 – ترعي الدولة الأخلاق والآداب والنظام
العام .... أي أخلاق وأي آداب بقي ؟؟ ولما انت ترعاها ربنا عمل أب وأم ليه وأديان
ليه ؟؟ أي أخلاق وانت أي حد ضدك كافر وعميل وأجندة .. أي أخلاق وانتو شبعتونا شتيمة
وخوض ف الأعراض ؟؟ يابتوع هنهد الأهرامات
4- المادة:14 – لو اتشقلبت علي دماغك مش هتقدر تعرف
محددات خطة الدولة الإقتصادية ..كلام حلو من غير أي خطوات عملية ..يعني ضحك
عالدقون وفتح الملعب للفساد ومص دم الناس
5- المادة 26 – ليه مش عايز تقول إن الضرائب تصاعدية ؟؟
يعني اللي بيكسب أكتر يدفع أكتر ؟؟ ليه بتلف وتدور علشان تحمي رجال أعمالك ورجال
أعمال المخلوع ؟؟
6- المادة :48- يعني إيه الصحافة تشتغل في إطار المقومات
الأساسية للدولة والمجتمع ؟؟ اللي هيا إيه ؟؟طبعا محددتهاش علشان تقفل في الصحف
وترهبها براحتك
7- المادة :50 - يعني إيه التظاهر يكون بناء علي إخطار
؟؟ طب وبعد الإخطار إيه اللي هيحصل ؟؟ قاللك ينظمه القانون اللي أكيد هيقول إن من
حق الداخلية تمنع التظاهر ..قديمة إلعب غيرها
8- المادة :57 – يعني إيه تمنح الدولة حق الإلتجاء
للأجانب المحرومين في بلادهم من الحقوق والحريات العامة التي يكفلها الدستور ؟؟ أي
دستور ؟؟ وله محددتهاش زي الدساتير اللي فاتت بالمضطهدين بسبب الدفاع عن مصالح
الشعوب ؟؟ طبعا علشان تجيبلنا رجالتك من أفغانستان ومن جبال العالم ياكلوا ويشربوا
ويبلطجوا علينا ببلاش
9- المادة :58 – يعني إيه تلتزم جميع المؤسسات التعليمية
العامة والخاصة والأهلية وغيرها بخطة الدولة التعليمية وأهدافها ؟؟ اللي هيا إيه
الخطة دي؟؟عاملهالنا مفاجأة مثلا ؟؟يابتوع تدريس الإنجليزي حرام ؟؟
10- المادة :62- تلتزم جميع المنشآت الصحية بتقديم العلاج
بأشكاله المختلفة لكل مواطن في حالات الطوارئ أو الخطر علي الحياة ... معرفتكش أنا
كده طب واللي عنده الكبد ولا السرطان ولسه مموتوش هتعالجه يعني وللا إيه ؟؟ويا تري
مين هيحدد حالات الطوارئ أو الخطر علي الحياة ؟؟ طب واللي مبيموتش بس تعبان
وممعاهوش يتعالج إيه النظام ؟؟
11- المادة :64- ولا يجوز فرض أي عمل جبرا إلا بمقتضي
قانون ... يعني تجيب برلمان يطلع قانون يشغلنا في السخرة مثلا ؟؟ يا راجل اختشي دا
دستور قبل الثورة كان بيشترط إن العمل الجبري مينفعش إلا بقانون ولأداء خدمة عامة
وبمقابل عادل .. مش عيب ترزية السادات يكونوا أشطر وأحن علينا من ترزيتك ؟؟
12- المادة :68- المسكن الملائم والماء النظيف والغذاء
الصحي حقوق مكفولة ..... معرفتكش أنا كده ، مين اللي هيكفلهم بقي ؟؟ ومين هيوفرهم
؟؟ ومين ملتزم بيهم ؟؟ أمنا الغولة مثلا ؟؟ وليه مقلتش إن الدولة تتكفل بيهم لغير
القادرين ؟؟ الفقراء ف البلد دي مش علي مزاجك وللا إيه ؟؟
بص يا عم الدستور داه اصلا بيتعمل علشان يحافظ علي الحد
الأدني من حقوقك وعلشان يلزم الدولة بإلتزامات واضحة ناحية المواطنين مش شوية كلام
حلو وعايم يخلوا اللي يسوي واللي ميسواش يتحكم فينا إلي ما شاء الله .. بص يا عم
الدستور داه بيتعمل علشان ناخد حقوقنا من عينين التخين مش معمول علشان يربينا.. بص
يا عم الدستور داه مينفعش يبقي فيه غلطة ولا جملة ممكن تتفسر غلط علشان منروحش
كلنا ف داهية ولا نسلم رقابينا لمجنون أو متطرف يمكن ربنا يبلينا بيه ف يوم من
الايام ..هوا إحنا عملنا ثورة ليه ؟؟لو الدستور مش هيدينا حرية وعيش وكرامة
إنسانية هنوافق عليه ليه؟؟... سلام
