تحديث بخصوص حادثة العمرانيه

الداخليه في الحادثه كانت بتقول إيه بقي ؟ هاه ؟ نفكركم ببيانهم هنا

http://tinyurl.com/3g3w3p4

قاللك ان المجني عليه سبق اتهامه في عدة قضايا ومطلوب للتنفيذ عليه في القضيه 26934 لسنة 2008 جنح العمرانيه يعني عليه حكم صح ؟

نبص مع بعضينا علي صورة الشهاده الرسميه دي :

بتقول الشهاده إن المحكمة حكمت في القضيه بانقضاء الدعوي بالتصالح بتاريخ 21/6/2009 يعني كدابين آخر تلاتين اربعين حاجه وبيحاولو يشوهوا سمعة المجني عليه بشكل قذر

طيب أخدوه م المستشفي علي فين ؟

علي حجز قسم الجيزه بالرغم من ان تقرير تسليمه لهم بيقول إيه ؟ نبص عالصوره بتاعة التقرير هنا :

بيقول مطلوب له وجبات متعدده متكرره لينه وغير مشبعه مع حزام للبطن وغيار يومي لمدة عشرة أيام ... وطبعا من حرصهم علي حياته رموه في حجز قسم الجيزه والراجل بينزف دلوقتي وأهله خايفين الجرح يتلوث بسبب قذارة الحجز والحر والمأمور رافض يوديه المستشفي وبيقولله علشان نغيرلك عالجرح لازم قسم العمرانيه يقول لأنك أصلا مش المفروض تتحجز عندنا !!!!

عزيزتي حقوق الإنسان : وحشتيني قوي .... وسالخير يا شرطه ياللي ف خدمة الشعب

الداخلية وسنينها

حسن صبحي حسين 28 سنة سائق توكتوك بالعمرانيه وأثناء سيره في اتجاه مخالف استوقفه ضابط مرور يدعي عيسي السيد راشد وقام برفع التوكتوك علي ونش المرور وبعد رجاء السائق للضابط أن يتركه :

دي رواية الداخليه :

http://tinyurl.com/3g3w3p4

وبالنسبة لرواية أهل المجني عليه :

سواق التوكتوك انطلب منه 200 جنيه علشان يخلوه ياخد التوكتوك ويمشي فاتصل بأخوه محمود صبحي حسين وقالله هات معاك 200 جنيه وأوراق التوكتوك وتعالي فالراجل جه وقعد يتحايل عالظابط علشان المبلغ دا كبير (إضافه:الشهود أكدولي انه دفع المبلغ بس أصر انه ياخد إيصال باللي دفعه فيما بعد الكلام دا عرفته بعد ما كتبت التدوينه دي لذا لزم التنويه ) فالظابط قالله : هوا انت المحامي بتاعه يابن ال......اكه ... محمود قال للظابط امك مش أحسن من أمي ورد عليه الشتيمه فالظابط أمطره بسيل من الشتايم وقالله لو ممشيتش من هنا هضربك بالنار محمود قالله انت كداب ومش من حقك تعمل كده ... فالظابط طلع سلاحه الميري وهدد محمود اللي رفض يمشي من غير التوكتوك اللي بياكله منه عيش وصمم علي طلبه وحصلت مشاده كلاميه بينه وبين الظابط اللي أطلق عليه عيارين ناريين واحد في بطنه وواحد في أعلي فخذه الأيمن والناس شالوه وطلعوا ع مستشفي أم المصريين .. وجه ظابط مباحث من قسم العمرانيه قال انه عايز شهود الواقعه علشان يعملو محضر بيها وفعلا راح معاه اتنين شهود وأخو المجني عليه وقاله ان الظابط هواللي غلطان فاعتدو عليهم بالضرب في القسم ورموهم ف الحجز وعملولهم قضية تعدي عالسلطات وجابو شهود تانيين يشهدو برواية المباحث والنيابه قررت حبسهم 4 أيام علي ذمة التحقيق وبعدها جددتلهم 15 يوم تانيين وامباحث كانو مصممين ينقلو محمود م المستشفي لمستشفي السجن ولكن حالته ما سمحتش وكلبشوه ف السرير

أهل محمود نزلو التحرير يوم الجمعه 27 مايو يطالبو بحق ابنهم من الداخليه ومن ساعتها كل شويه رتبه تروح أوضة محمود في المستشفي يهروه شتيمه وتهديد ويمشوا ودلوقت محمود وأخوه مهددين بإنهم يتحبسوا ظلم بالرغم من إن الظابط هواللي أخطأ وخالف قواعد استعمال السلاح الناري المنصوص عليها في قانون هيئة الشرطه إضافة لإنه محدش عارف الإصابات اللي في المجني عليه اللي كانت ممكن تقتله بسهوله محدش عارف هتسيب فيه عاهه مستديمه وللا لاء ؟

وطبعا أنا مش مصدق رواية الداخليه إطلاقا لسبب بسيط هوا انهم قالو في بيانهم ان الظابط أطلق عيارين نار في الهوا وواحد علي قدم المجني عليه بس واضح انهم عندهم مشكله في العد ومشكله في معرفة القدم من البطن

 وادي صورة محمود

وادي فيديو لمحمود متكلبش وهوا في حالته الصحيه الزفت

والحدق يفهم بقي مين اللي بيداري ع مصيبته

الله يرحمك يا رجوله

أولا وقبل كل شئ : حكم عسكر تاني لاءءءءءءءءءءءءه كفايه كده

كفايه كده لأننا متنصفناش فيكم ، كفايه كده لأنكم بتحاولو تدونا علي قفانا كل منديكم ضهرنا ، كفايه كده لأننا مخلصناش من محاكم مبارك الظالمه علشان يطلعلنا ماكينات إدانه،كفايه كده لأن أسلوبكم في التعامل مع الناس بيقول ان العادلي وزبانيته مكانوش فلته،كفايه كده لأن واضح ان مصر منصابه ف مجالسها واي حاجه اسمها مجلس مبتوريناش يوم حلو ، كفايه تعذيب وكهربا ، كفايه اعتقال بدون وجه حق ،كفايه تلفيق تهم ،كفايه محاكمات جايره، كفايه دكتاتوريه ،كفايه ضحك عالدقون

المجلس محماش الثوره ومكانلوش دور فيها وانتو عارفين كويس ان الجيش دا بظباطه وعساكره ملك الشعب ومنه وروحهم فداه وعمرهم ما كانو هيمدو إيديهم علي حد من الثوار ..إنما انتو ...... هاه من أيام المخلوع :*) ... إحنا تخيلنا انكم فهمتو اللي فيها وان الكفن مالهوش جيوب " ضحكه شريره " وان الشعب لما يقوم وينادي هيبقي يا هوا يا أي حد في الدنيادي ... اللي رزع الأمن المركزي بظباطه بمدرعاته وعربياته وسلطاته وبابا غنوجه علقة ما أكلهاش حرامي ف حاره سد قادر يكرت أي حد علي قفاه ... واحنا بالصلاه عالنبي قرينا الفاتحه ف أول الثوره دي عالخاين والمفتري وابن الحرام .. ما تلايموها بقي وكفايه وتتكلو علي الله من غير مطرود إحنا مخلصناش من مبارك علشان يطلعلنا تسعتاشر مبارك ... هوا تدوينة مايكل نبيل بتغيظكم ؟؟ هاه بتغيظكم طب أهه http://www.maikelnabil.com/2011/03/blog-post_07.html

وبعدين إيه ماسورة الوطنيه اللي طفحت منكم إذ فجأة دي ؟هاه ، وخلاكم تخونو الناس بدون مبرر وتقولو انكم بتفهمو أحسن من أي حد ؟ وانكم بتحبو البلد دي أكتر مننا ..... هافف عليا قوي واحده : يحز في نفسي J

 طب وهوا ماسورة  الوطنيه ومدرسة الوطنيه اللي فالقيننا بيها دي مقالتلكوش ان عيب تبقو واقفين بدباباتكو ومدرعاتكو وسلاحكو واحناللي ندافع عن نفسنا ف التحرير ؟ هاه ؟

طيب مدرسة الوطنيه خلتكو تطنشوا أول كنيسه تتحرق في مصر من أيام عمرو بن العاص وتسيبوها للبلطجيه ؟ هاه ؟

طيب هيا دي المدرسه برضه اللي خلتكم تضربو نار يوم 9 ابريل طول الليل علي 700 شاب صغيرين ؟

طيب هيا دي المدرسه اللي قالتلكم تسمحو بضرب النار الحي علي المتظاهرين ضد الصهاينه ؟

طيب هيا دي المدرسه اللي خلت شوية معرصين من الشرطه يلووا دراعكم ويحرقو ورق ادانتهم وتزودولهم مرتباتهم كمان وميشتغلوش ؟

طيب هيا دي المدرسه اللي خلتكم توافقو من زماااااااااااان ان سينا تبقي منزوعة السلاح ؟ "الشهيد سليمان خاطر بيتف عليكم ع فكره "

طيب تكونش برضه هيا المدرسه اللي خلت حد منكم يقول لحسن نافعه وحسام عيسي وجمال زهران انتو كنتو فين واحمدو ربنا اننا مش زي ليبيا ؟ " هيا المدرسه دي مفيهاش جرايد وللا إيه ؟

وهيا دي المدرسه اللي علمتكم ان الديمقراطيه انكم تعملو استفتا علي عشر مواد وتسيبو الناس تقطع بعض وبعدين تنزلو اعلان دستوري 62 ماده ؟

طيب هيا دي برضه المدرسه اللي الفنان التشكيلي فيها بيبقي بلطجي ؟

طيب متعلمتوش في المدرسه دي إن عيب صور مبارك تبقي علي حيطانكم وهوا قاتل 1000 شاب زي الورد من ولاد البلد دي ؟

طب في المدرسه دي علموكم ان السجن زيه زي المستشفي وان شرم الشيخ متفرقش كتير عن طره ؟

طب قالولكم في المدرسه دي انكم آلهه مثلا ؟ ومينفعش الناس تنتقد أدائكم السياسي ؟

طب مقالولكوش في المدرسه دي ان اللي بيلعب بالنار بيتلسع منها ؟

طب مكانوش بيدرسولكم هناك أمثله شعبيه زي ان اللي بيتلسع من شوربة مبارك ينفخ في زبادي المجلس ؟

طب قالولكم في المدرسه دي انكم تخوفو الغلابه وتسمحو بالإشاعات بتاعة المخزون الاستراتيجي خلص والحركات دي ؟ هاه ؟

طب قالولكم بصراحه في المدرسه دي اننا هبل أو لسه برياله مثلا ؟

الله يرحمك يا رجوله

نجيب بقي م الآخر : انتو بتقبضو مرتباتكم علشان تدافعو عن البلد دي ضد العدو الخارجي ..يعني م الآخر الحدود قشطه جدا عليكم علشان تقريبا احنا شكلنا مش عاجبكم وعفا الله عما سلف ، ادونا بس شوية الصيع اللي شتمو الثوار وكهربوهم وعذبوهم ولفقولهم تهم نتعامل معاهم بمعرفتنا واتكلو علي الله طريقكم أخضر أو اقوللكم ما تروحو تجيبو المليون ونص مصري اللي مزنوقين ف ليبيا ؟ فكره والله ونزفكم لحد السلوم بالطبل البلدي كمان ... وبما انكم بتقبضو مرتباتكم من جيوبنا هقوللكم زي الرأسماليين مبيقولو : خافو علي أكل عيشكم وكفايه كده .... لقد ورمنا ......ورمنااااااااااااااااا
ونسمع مع بعضينا واحده من روائع الطرب :)

بسم الله الرحمن الرحيم ....الإجابه : التحرير

عملنا ثوره بعد 30 سنه ظلم وقهر وقلة قيمه وتعذيب وسرطان وفساد وسرقه ونهب وتفريط في الأرض والعرض ومطاطيه للي يسوي واللي ميسواش … وخرجنا وخسرنا في المعركه أكتر من 1000 شاب وشابه ..بوكيه ورد راح فدا البلد دي غير المصابين واللي بقوا معاقين للأبد ، اللي اتعمي واللي فقد الحركه …. إلخ … وقلنا الجيش والشعب إيد واحده وهيحمونا وقالولنا اننا هنحافظ علي مطالب الثوره وهنسعي لتحقيق طموحات الشعب المصري : نبص بقي بصه سريعه كده :

- من مطالب الثوره :

* إلغاء جهاز أمن الدوله ومحاسبة الضباط المتورطين في قضايا تعذيب واعتقالات بدون وجه حق ..وكانت النتيجه إحلال جهاز الأمن الوطني مكان أمن الدوله بنفس الضباط اللي طلعوا ديننا

* الغاء قانون الطوارئ … لسه فيه قانون الطوارئ

* حريه وكرامه … لسه بنتعذب وبيتقبض علينا بدون وجه حق وبنتكهرب وبنتحاكم محاكمات جايره والبرامج بتتقطع في النص لو الكلام مش عاجب ولازم الكل يطبل

* عداله اجتماعيه ..قاللك احتجاجات العمال (المطحونين واللي طلعان عين أهاليهم ) فئويه وعملولنا قانون بيجرم حتي الاضراب والاحتجاجات ولا قالولنا فيه حد أدني للأجور ولا حد أقصي .. ولا أي بلح

* تصدير الغاز لإسرائيل ...شغال زي الفل واحنا مش لاقيين انبوبة بوتاجاز

* محاكمة مبارك …....... طلعت نكته أول مره اشوف واحد محبوس في العنايه المركزه وإيه كمان قبل ما يتحاكم ولا ياخد أي عقاب بيقوللك بيطلب العفو وهيذيعو الاعتذار كمان

* طب محاكمة سوزان ..برضه في العنايه المركزه الخمس نجوم

* طب علاء وجمال .. محبوسين احتياطي ومافيش اي اجراء وقلبولهم طره ولا بورتو مارينا

* طب بيقة الشله ..يا دوبك كانو بيخزو العين بحبيب العادلي

*اطلاق الحريات ..اي حد يقول بقين في السليم بيتشيع ..بثينه كامل مثالا

* طيب معاشات للمصابين وأهالي الشهدا … طلعت بلح

وعلي رأي عمنا الأبنودي : خطب كتير وكلام ودعايه في الإعلام كله كلام في كلام

وخد عندك بقي : 

* الشرطه مبتشتغلش زتدخل قسم تطلب نجده يقوللك مش عملتو ثوره اشربو

* كنايس بتتهد وتتحرق

* سلفيين ومسيحيين مطلعين دين أم بعض

* الحمايه ما بتبقاش لازمه غير للحفاظ علي علي مقر السفاره الاسرائيليه ومفيش مانع من ضرب النار في المليان والقبض علي الشباب اللي زي الورد وشيع عالمحكمه وكأنهم هما سبب اللي احنا فيه

* وخد عندك بقي : الحقو يا ناس الاحتياطي الاستراتيجي بيخلص .. تيجكو حمرا علي فكره

أزمة السولار مجابتش نتيجه يبقي خلاص نعمللهم أزمه في البنزين

…........ الرد المناسب في الحاله دي هوا أحا علي فكره

مبارك وسوزي والكلبين الصغيرين وبقية العصابه لازم يتحبسو لأنهم أجرمو فحق شعب ، زمايلنا المحبوسين في قضايا فشنك لازم يخرجو ، العداله الاجتماعيه والحريه هيحصلو هيحصلو وقانون الطوارئ برضه هيتلغي وكل اللي قلنا عليه هيتعمل …. ولو مش مصدقين احب اقوللكم : ان كنتو نسيتو اللي جرا هاتو الدفاتر تنقري وافتكرو كويس احنا عملنا إيه من كام شهر

ولو عايزين تصدقو أكتر تعالو اتفرجو علينا ف التحرير يوم 27 مايو انشاءالله

محسن

يوم 28 يناير وانا واقف ف ميدان التحرير عند الجامعه الأمريكيه بصيت عالشاب اللي واقف جنبي .. لفت انتباهي صغر سنه وملامحه المصريه قوي ، شعر مجعد وبشره قمحيه اقرب للسمار وبيهتف بحماس ملفت وصوته رايح من كتر الهتاف ، لقاني ببرقله قاللي فيه حاجه يا كابتن قلتله انت مش صغير شويه علي انك تبقي هنا ؟ قاللي اتصدق عيب عليك يا هندسه .. هوا انا مش مصري وللا ايه ؟ مفيش حد هنا احسن من حد علي فكره ومفيش النهارده صغير ولا كبير بقوللك ايه معاك سيجاره ؟ اديته سيجاره شد منها نفسين وقاللي اتصدق بالله ؟ أنا شفت في البلد دي مرار قد راجل عنده 40 سنه وعالم مالهاش لازمه كل يوم تقل قيمتنا وحاجه قرف ... قلتله أهلك عارفين انك هنا ؟ قاللي هوا فيه حد النهارده أهله هيسألو عليه ؟ أي واحده عندها عيال ومخبياهم تبقي مخلفتش رجاله بصيتله وضحكت وقلتله خللي بالك من نفسك وما تروحش يمة وزارة الداخليه علشان فيه ضرب نار .. قاللي يا باشمهندس الأعمار بيد الله ..انت خايف وللا ايه ؟ قلتله مش خايف ع نفسي بس خايف عليك .. قاللي انا مبسوط علشان كل واحد يقابلني يقوللي انه خايف عليا ، قبل كده فيه ناس كانت بتبصلي كأني جربه ولو مت النهارده مش هزعل .. مش احنا بنعمل حاجه صح ؟ قلتله طبعا دي بلدنا ومستقبلنا ... قاللي ربنا يوفقنا ... بعدها سمعنا صوت ضرب نار اتلفتنا علشان نعرف الضرب جاي منين وهوا اتحرك خطوتين جنبي وفجأه لقيته وقع عالأرض فوطيت عليه لقيته بيبتسم ومبيتكلمش وانا مش عارف ايه اللي حصلله ، لقيته واخد رصاصه في جنب دماغه الشمال (معرفش ساعتها انها رصاصه ) شلته انا وكام شاب واقفين ورحنا المستشفي الميداني والدكاتره اللي شافوه قالو انه غالبا عنده نزيف داخلي شديد ومش هيكمل ، حاولت الاقي ف جيوبه بطاقه او كارنيه او موبايل بس مالقيتش .. قفلت عينيه بإيديا وبقيت مش شايف قدامي ... الولد داه عمري مهنساه وحازز في نفسي اني متعرفتش عليه أكتر ولا عرفت اسمه حتي بس شكله ابدا مبيفارقنيش وهوا واقع عالأرض وبيبتسم ... عينيه كانت بتقول كلام كتير كان نفسي اسمعه منه ..

تاني يوم جاني في هشام مبارك واحد ومراته بيسألو ع ابنهم 16 سنه واسمه محسن وكان في التحرير ومارجعش ولا لاقيينه وعرفو ان في ناس ماتت وقلقانين عليه .. الطبيعي اننا كنا بنطلب من الناس صوره للمفقود او وصف ليه وكان معاهم صوره ... شفت الصوره وطلع هوا نفس الشاب .. جريت ع مالك مصطفي حكيتله وسألته اعمل ايه ؟ نصحني اني مقوللهمش دلوقت ... وقلت للناس فعلا اننا اول منعرف خبر عنه هنبلغهم واديتهم تليفوني وأخدت تليفونهم وبعدها بكام يوم اتصلو بيا وقالو انهم لقيوا محسن في المشرحه وابوه قاللي انه علي قد ما حازز فيهم فراقه بس امه نازل عليها سكينه غريبه وبتقول انا لله وانا اليه راجعون وان هيا مبسوطه علشان ابنها مات شهيد ومات راجل وهوا كمان فرحان بابنه .

 الله يرحمه ويرحم كل الشهدا

القصه دي حقيقية بكل تفاصيلها ... ومهداه لتجار الثوره والمتاجرين بدماء الشهداء

اضطراب

أكاد أجزم بأنني لست علي ما يرام .

كانت تلك إجابته عندما سأله أحدهم كيف حالك.. ودائما ما كانت تلك إجابته إذا سأله أحد عن أحواله منذ .... منذ متي ؟ هو لا يعلم تحديدا ، فقط هو يعلم أن كل يوم يمر عليه يذهب بقطعة منه بلا رجعه .. شعور بأنه يتناقص .. شعور غريب أن تشعر أنك تنفذ .. حاول حماية نفسه مرارا وتكرارا تارة بهالة من العلم وتارة بهالة من الدين وتارة بهالة من الحب وتارة بهالة من الانعزال وتارة بالموسيقي أو بجمع من الأصدقاء ولكن كل ذلك لم يجدي نفعا ... دائما كانت روحه في حاجة إلي حماية من نوع ما لم يستطع توفيرها ... راودته فكرة الرحيل مرارا وتكرارا ولكنه يعلم تماما أنه إذا ذهب فلن يعود ، ترك نفسه للريح لعل روحه تستكين لكن زاده ذلك شقاءا علي شقائه ... شغل نفسه بالأسرار : سر الحياة وسر الموت فجذبه سر الموت ومن وقتها نذر نفسه للبحث عنه .. أعجبته الفكره فالموت له بريق لا يقاوم ، الموت هو الرحلة الوحيده التي اذا قمت بها فلن تعود لتروي ما شاهدت ، هو الرحلة الوحيده التي لا نقول لمن حولنا إلي اللقاء قبل أن نقوم بها .. هو الرحلة الوحيده التي تضمن لك راحة ابدية من كل ما مررت به وتقطع عليك طريق المعاناه ، لكن هل تبدأ مع تلك الرحلة معاناة من نوع جديد ؟ خلود ؟ هل سيقابل من سبقوه إلي الرحله ؟  عاصفة لا تنتهي من الاسئله .. كم تمني لو عاد إليه أي ممن فارقوه ليخبره  ................. يتبع